काठमाडौँ । प्रतिनिधिसभाका सांसद अमरेशकुमार सिंहले सरकारले गाउँगाउँमा गरिब जनतालाई बिनाधितो बैंकहरूले ऋण दिने व्यवस्थाको ग्यारेन्टी गर्नुपर्ने बताएका छन्। आइतबार प्रतिनिधिसभाको दोस्रो बैठकमा ‘मुलुकी संहितासम्बन्धि केही नेपाल ऐनलाई संशोधन गर्ने विधेयक, २०८०’ माथिको सैद्धान्तिक छलफलमा भाग लिँदै उनले सो कुरा बताएका हुन्।
सांसद सिंहले गाउँका गरिब जनताबाट निक्षेप संकलन गरेर बैंकहरूले ठूला व्यापारीहरूलाई मात्रै ऋण दिने गरेकोमा आपत्ति जनाए। उनले भने, ‘सबै बैंकहरू ठूला व्यापारीका लागि छन्। ठूला नेताहरूको घरघरमा त ठूला व्यापारी आउँछन्। बिचरा, गरिब, दलित, किसान त आउँदैनन्।
गरिब जनताले चाहेको बेलामा बैंकहरूले ऋण दिने व्यवस्थाको सरकारले ग्यारेन्टी गर्नुपर्छ। होइन भने बैंक भनेको त ठूलाहरूको मात्रै हो। मेरो गाउँमा नेपाल बैंक लिमिटेडको शाखा छ। तर गाउँका गरिब जनतालाई कहिल्यै पनि ऋण दिँदैन। तर त्यहाँका जनताले बचत गरेको रकम काठमाडौँ पठाउँछ। त्यसकारण यो ऋणीका लागि कानुन बनाउन खोजिएको छ।
सांसद सिंहले गरिबसँग धितो राख्ने कुनै सम्पत्ति नहुने भएकाले उनीहरूलाई राज्यले नै जमानी बसेर बैंकहरूबाट ऋण लिने व्यवस्था गर्नुपर्नेमा पनि बताए।
