बुटवल । लुम्बिनी प्रदेशका मुख्यमन्त्री चेतनारायण आचार्यले तिहार पर्वले नेपाली समाजमा आपसी प्रेम, सद्भाव र एकतालाई थप मजबुत बनाउने बताएका छन् ।
तिहार–२०८३ को अवसरमा शुभकामना सन्देश जारी गर्दै उनले तिहार नेपाली मौलिक संस्कृति, परम्परा र राष्ट्रिय पहिचानसँग जोडिएको विशेष पर्व भएको उल्लेख गरेका छन् ।
मुख्यमन्त्री आचार्यले काग, कुकुर, गाई तथा गोरुको पूजा गर्ने परम्पराले मानव र प्रकृतिबीचको सम्बन्धसँगै सम्पूर्ण प्राणीप्रति सम्मान र कृतज्ञताको भावना अभिव्यक्त गर्ने बताएका छन् । लक्ष्मीपूजा, भाइटीका र देउसी–भैलोले पारिवारिक आत्मीयता तथा सामाजिक एकता बढाउन महत्त्वपूर्ण भूमिका खेल्ने उनको भनाइ छ ।
उनले मौलिक संस्कृति र परम्पराको संरक्षण गर्दै नयाँ पुस्तामा हस्तान्तरण गर्नुपर्नेमा जोड दिएका छन् । देउसी–भैलोबाट सङ्कलित रकम सामाजिक हित र रचनात्मक कार्यमा खर्च गर्ने अभ्यासलाई पनि उनले सकारात्मक सांस्कृतिक परम्पराका रूपमा लिएका छन् ।
मुख्यमन्त्री आचार्यले मुलुकका विद्यमान समस्या समाधानका लागि संविधानको पूर्ण कार्यान्वयन, लोकतान्त्रिक मूल्यको संरक्षण र सुशासन आवश्यक रहेको बताएका छन् । प्रदेश सरकार पारदर्शी, सुशासनयुक्त र जनउत्तरदायी शासन व्यवस्था निर्माणमा प्रतिबद्ध रहेको उनले स्पष्ट पारेका छन् ।
‘समृद्ध लुम्बिनी, खुसी नागरिक’ को लक्ष्य हासिल गर्न कृषि, पशुपालन, उत्पादन, उद्यमशीलता र रोजगारी सिर्जनालाई प्रदेश सरकारले प्राथमिकतामा राखेको उल्लेख गर्दै उनले तिहारले दिने सहयोग, सद्भाव र एकताको भावनालाई व्यवहारमा उतार्न सबैलाई आग्रह गरेका छन् ।
मुख्यमन्त्री आचार्यले तिहारको अवसरमा सम्पूर्ण प्रदेशवासी तथा नेपाली दाजुभाइ दिदीबहिनीमा सुख, शान्ति, समृद्धि र प्रगतिको शुभकामना व्यक्त गरेका छन् ।
