बुटवल । बुटवलको तल्लो सिद्धबाबा मन्दिरमा आर्थिक अनियमितता भएको फेला परेको छ । बुटवल उपमहानगरपालिका वडा न–३ सिद्धार्थ राजमार्ग अन्र्तगत पाल्पा र रुपन्देहीको सिमाना रहेको मन्दिरमा आएका भक्तजनहरुले शुभ कार्य गरेवापत सेवा दस्तुर स्वरुप दिएको रकम हिनामिना भएका केहि रसिदहरु फेला परेका हुन् । जसले गर्दा धार्मिक क्षेत्रमा मन्दिर व्यवस्थापन समितिभित्र रहेका व्यक्तिबाटै आर्थिक अनियमितता भएको पाईएको हो। दाताहरुबाट जम्मा गरिने रकम संकलन गर्ने व्यक्तिबाट लिखित रुपमै दुई थरि रसिद काटेर वास्तविक दिएको रकम र नियतवस कम रकम दिएको काटिएको रसिद फेलापरेपछि सर्वत्र आलोचना हुन थालेको छ ।

मन्दिरमा सेवा लिएबापत भक्तहरुले बुझाएको रकमको रसिदको अर्धकट्टीमा आधा रकम घटाएर मात्र मन्दिरमा दाखिला हुने गरेको प्रमाण सार्वजनिक भएको हो । यो घटना थाहाँ पाएको मन्दिर ब्यवस्थापन समितिले गुपचुप राख्न प्रयास गरेपनि तर शनिवार एकाएक सामाजिक सञ्जालमा अनियमितता गर्न खोजेको कर्तुतकाको प्रमाण रसिदसहितको तस्विर सार्वजनिक गरेर घटना बाहिर आएकोे हो । एकबर्ष अगाडि सैनामैना नगरपालिका वडा न–४ का राजकुमार कार्की (विलमा कुमार कार्की) लेखिएका व्यक्तिले भने, मैले १ हजार १ सय ५ रुपैयाँ दिएको हुँ । त्यतिवेला खासै यसलाई चासो दिएन, धार्मिक ठाउँमा यस्तो होला भनेर सोँच पनि भएन । अहिले आएर थाहाँ भयो कि धर्म कमाउने ठाउँमा लूट हुँदो रहेछ भनेर । 

सो मन्दिर व्यवस्थापन समितिको २०७९ मंसिर २४ गतेदेखि समयावधि सकिएको छ । हाल सोही पुरानै समितिले कामचलाउको रुपमा चलाउँदै आएको पाईएको छ । जसको बेथिती मन्दिरमा आर्थिक अनियमितता मौलाएको रहस्य बाहिरीएको हो । व्यवस्थापन समितिका पूर्वअध्यक्ष एवं हालका कामचलाउ अध्यक्ष कृष्ण प्रसाद तिमल्सिनाकै मिलोमतोमा वर्षौदेखि दान रकममा हिनामिना हुने गरेको सामाजिक सञ्जालकर्ताहरुको टिप्पणी गरेका छन् । भेटिएको नगदी रसिदमा दानकर्तालाई दिइएको रसिदको रकम भन्दा आधा घटाएर अर्धकट्टीमा लेखिएको स्पष्ट देखिएको छ।

यता कामचलाउ अध्यक्ष तिमिल्सिनालाई यसबारेमा सत्यता बुझ्न पटकपटक सम्पर्क गर्दा पनि फोन उठेन । यसैविच सो मन्दिर व्यवस्थापन क्षेत्रमा लामो समयकाम गरेका पूर्वअध्यक्ष लवकुश श्रेष्ठले उक्त घटनाले आफूलाई समेत लज्जित बनाएको वताए । मन्दिरमा भेटिएको अनियमितता विरुद्ध अख्तियारमा समेत उजुरी परेपछि कारबाही प्रक्रिया अघि बढेको बताईएको छ  ।