काठमाडौँ । फिल्म ‘पूर्ण बहादुरको सारङ्गी’को प्रदर्शन निरन्तर चलिरहेको छ ।
निर्माताले सोमबारबाट फिल्म उतार्ने भन्दै विज्ञप्ति जारी गरेपनि फिल्मको प्रदर्शनमा वितरकले निरन्तरता दिएका हुन् । निर्माताले कागज गरेर वितरकलाई जिम्मा दिएपछि प्रदर्शन जारी राख्ने भएको वितरक प्रचण्डमान श्रेष्ठले बताए ।
‘पूर्णबहादुरको सारङ्गी’ निर्माता र वितरकबिच भएको सहमतिपत्रको दुई नम्बर बुँदाले वितरकलाई फिल्मको प्रदर्शन जारी राख्न अधिकार दिएको छ’, वितरक श्रेष्ठले भने, ‘हामीले प्रदर्शन निरन्तर राख्न हललाई भनेका हौँ ।’
वितरकले हललाई प्रदर्शनका लागि निरन्तरता दिन भनेपछि निर्माण संस्था सेभेन सिज सिनेमाले पनि वितरकसँग छलफल गर्दै फिल्मलाई निरन्तरता दिन सहमति भएको छ । सेभेन सिज सिनेमाले सोमबार बिहानै एक विज्ञप्ति जारी गर्दै फिल्मको प्रदर्शन निरन्तर रहने जनाएको हो ।
