काठमाडौं । गृहमन्त्री रमेश लेखकसहित ५ जना संघीय सांसदविरुद्ध सर्वोच्च अदालतमा दायर अदालतको अवहेलना मुद्दा आज पनि हेर्न नमिल्नेमा परेको छ ।
सर्वोच्च अदालतका न्यायाधीशद्धय नित्यानन्द पाण्डे र अब्दुर लजीम मुसलमानको इजलासमा सो मुद्दाको पेशी तोकिएको थियो । तर, न्यायाधीश पाण्डेय गृहमन्त्री लेखकका आफन्त रहेको हुँदा उनले मुद्दा हेर्न नमानेपछि हेर्न नमिल्नेमा परेको हो ।
अधिवक्ता यज्ञ प्रसाद अधिकारीले गृहमन्त्री रमेश लेखकसहित सांसदहरु श्यामकुमार घिमिरे, सुर्यबहादुर थापा क्षेत्री, अमरबहादुर थापा र महेश कुमार वर्तौलाविरुद्ध ०८० पुस २ गते अदालतको अवहेलनाको मुद्दा दायर गरेका थिए । यसअघि गत भदौंमा सो मुद्दा पेशीमा परेपनि हेर्न नभ्याईनेमा परेको थियो ।
पूर्वाधार विकास कार्यक्रम कार्यान्वयन नगर्न सर्वोच्च अदालतले दिएको अन्तरिम आदेशका बारेमा असन्तुष्टि जनाउँदै दिएको अभिव्यक्तिले अदालतको अवहेलना भएको भन्दै अधिवक्ता अधिकारी अदालत पुगेका थिए ।
