काठमाडौँ । राष्ट्रिय दलित पत्रकार सङ्घ, नेपालले (नाडजोन) सर्लाही घटनाबारे छानबिन गर्न ‘उच्चस्तरीय छानबिन समिति’ गठन गर्नुपर्ने माग गरेको छ ।

नाडजोनका अध्यक्ष तथा सभासद् विनोद पहाडीले आज प्रेस विज्ञप्ती जारी गरी सर्लाहीका सत्येन्द्रकुमार राम (चमार) र नेहा रौनियारबीचको बैधानिक प्रेम विवाहलाई सहन गर्न नसकी सरकारका उच्च अधिकारीको संलग्नतामा उनीहरुप्रति गरिएको मानवता विरोधी व्यवहार र अन्यायपूर्ण ढङ्गले गरिएको कार्वाहीप्रति खेद प्रकट गर्दै अविलम्ब संसदीय वा उच्चस्तरीय छानविन समिति गठन गरि कार्वाही अगाडी बढाउनुपर्ने माग गर्नुभयो ।

‘सर्लाहीका अन्तरजातीय विवाहीत जोडीमाथी नेपालको संविधान ऐन कानून विपरित गरिएको भेदभावजन्य व्यवहार र दमनको घटनाप्रति हाम्रो गम्भिर ध्यानाकर्षण भएको छ, घटनामा जोडिएको गृह प्रसाशन, प्रहरी अधिकारीको भूमिकाको निष्पक्ष छानविन गरी घटनामा संलग्न दोषीलाई कानूनी कार्वाही अघि बढाउन र आमसञ्चार माध्यममा सरकारका गृहमन्त्री समेतको संलग्नता भनि आएको सवाललाई सरकार र संसदले गम्भिर रुपले लियोस्‌’, विज्ञप्तीमा भनिएको छ ।

नाडजोनले सो घटनाको सवालमा ऐक्यबद्धता जनाउन न्यायप्रेमी, नागरिक समाज, मानव अधिकारकर्मी, पत्रकार, सामाजिक अभियन्ता, राजनीतिककर्मी तथा सरोकारवालासँग अपिल गर्दै पीडितलाई न्याय निरुपण नगरी दोषीलाई संरक्षण गर्ने प्रवृत्ति दोहोरिएमा सशक्त सङ्घर्ष गर्ने समेत जनाएको छ ।