बुटवल । बुटवल उपमहानगरपालिकाले आगामी वर्षका लागि सामाजिक, भौतिक र आर्थिक विकासलाई प्राथमिकता दिँदै विभिन्न योजनामा ठूला बजेट विनियोजन गरेको छ। उपप्रमुख मनु अर्यालका अनुसार, पाल्पाको तिनाउ गाउँपालिकास्थित झुम्सा खानेपानीको मुहान क्षेत्रको संरक्षण र बुटवलमा पानी ल्याउन २ करोड रुपैयाँ विनियोजन गरिएको छ। गृहिणी महिलालाई स्वरोजगारसँग जोड्नका लागि ३ करोड, उद्यमशील महिलाका लागि ७० लाख र दलित समुदायका परम्परागत पेशालाई सीप विकास केन्द्रको रूपमा अघि बढाउन ८५ लाख विनियोजन गरिएको छ ।
त्यस्तै, बुटवल क्षेत्रका मुख्य र भित्री सडकहरूको हरियाली विस्तार र सौन्दर्यीकरणका लागि ३ करोड, ऐतिहासिक जितगढी किल्ला नजिकै आरती केन्द्र निर्माणका लागि ५ करोड र गौशाला व्यवस्थापनका लागि १ करोड बजेट छुट्याइएको छ। कृषिमा आधारित योजनामा पनि उच्च प्राथमिकता दिँदै किसान समूहलाई उपकरण खरिदमा अनुदान स्वरूप १ करोड र दुग्ध उत्पादक किसानहरूलाई प्रोत्साहनस्वरूप ५० लाख विनियोजन गरिएको हो ।
नगरका व्यस्त व्यापारिक क्षेत्रहरू कालिकापथ, अमरपथ र ट्राफिक चोकमा रात्रीकालीन बजार सञ्चालनका लागि ५० लाखको व्यवस्था गरिएको छ । यस्तै, अव्यवस्थित बसोबास र सुकुम्बासी क्षेत्रको नापजाँच व्यवस्थापनमा १ करोड ५० लाख तथा पुनःनापीका लागि २ करोड रुपैयाँ बजेट विनियोजन गरिएको उपप्रमुख अर्यालले जानकारी दिइन् ।
