बुटवल l संघीय स्वास्थ्य मन्त्रालयको स्वीकृति विना अवैध रूपमा सञ्चालनमा रहेका बुटवलका तीन आईभीएफ (In-Vitro Fertilization) केन्द्रमाथि जिल्ला प्रशासन कार्यालय रुपन्देहीले अनुगमन गर्दै एकलाख रुपैयाँ जरिवानासहित ताला लगाएको छ ।
प्रशासनको नेतृत्वमा जिल्ला स्वास्थ्य कार्यालय, रुपन्देही तथा सरोकारवालाहरूको सहभागितामा भएको अनुगमनपछि प्रनाभी, वरदान र वात्सल्य आईभीएफ सेन्टरलाई नयाँ बिरामी भर्ना गर्न नपाइने, पुरानाको उपचारलाई निरन्तरता दिने तर ४५ दिनभित्र सञ्चालन अनुमति नलिएमा पूर्णरूपमा बन्द गरिने चेतावनी दिइएको छ ।
बुटवल-९ मिलनचोकस्थित वरदान आईभीएफ सेन्टर, बुटवल-६ स्थित वात्सल्य क्लिनिक र बुटवल-१० राजमार्ग चौराहास्थित प्रनाभी आईभीएफ सेन्टरले संघीय स्वीकृति नलिई संवेदनशील स्वास्थ्य सेवा सञ्चालन गरेको पुष्टि भएपछि कारबाही अघि बढाइएको हो ।
स्वास्थ्य कार्यालयका वरिष्ठ ल्याब टेक्निसियन खिमलाल पाण्डेका अनुसार स्थानीय तहबाट सामान्य परामर्श अनुमति लिएर सञ्चालनमा रहेको वात्सल्य क्लिनिकलाई समेत एक लाख जरिबाना गरिएको छ। यदि पुनः आईभीएफ सेवा सञ्चालन गरेको भेटिएमा थप कानुनी कारबाही गरिने चेतावनी दिइएको छ ।
यसैबीच तिलोत्तमा नगरपालिका वडा नं. ३ जानकीनगरस्थित विपासना फर्टिलिटी सेन्टरले भने आवश्यक स्वीकृति लिएको पुष्टि भएको छ ।
अनुगमनका क्रममा श्रीकृष्ण आई केयर सेन्टर, तिलोत्तमा–१ मा पनि संघीय स्वास्थ्य निर्देशनालयबाट अनुमति नभएको पाइएपछि सेवा बन्द गराइएको छ ।
अनुगमन टोलीमा सहायक प्रमुख जिल्ला अधिकारी चिरञ्जीवी राना, नेपाल पत्रकार महासंघ अध्यक्ष दिनेश पाण्डे, औषधि व्यवसायी संघ अध्यक्ष कर्णबहादुर बस्नेत, वरिष्ठ गाइनोलोजिस्ट डा. वर्षा पौडेल लगायतको उपस्थिति थियो ।
जनस्वास्थ्य सेवा नियमावली २०७७ के भन्छ?
नियमावलीको परिच्छेद ४, नियम १२ अनुसार कसैले पनि इजाजतपत्र विना निजी, गैरसरकारी वा सहकारी स्वास्थ्य संस्था सञ्चालन गर्न सक्दैन ।
नियम १२ (३) अनुसार नियमावली प्रारम्भ हुँदा अवैध रूपमा सञ्चालनमा रहेका संस्थाहरूले तीन महिनाभित्र इजाजतका लागि आवेदन दिनु पर्ने स्पष्ट प्रावधान छ ।
आईभीएफ सेवा दिन चाहने संस्थाले स्त्री रोग सेवा, प्रयोगशाला, युएसजी, इम्ब्रोलोजी ल्याब, अपरेशन थ्रेटर र आकस्मिक सेवाको व्यवस्था सहित प्रारम्भिक विशेषज्ञ अस्पतालसँग सम्झौता गर्नु आवश्यक छ ।
