बुटवल । सहकारीमा जम्मा गरेको बचतकर्ताहरुको रकम अपचलन गरेको आरोपमा पक्राउ परेका बुटवलको अमरपथमा रहेको आगन्तुक बचत तथा ऋण सहकारी संस्था लिमिटेडका अध्यक्ष राजु घर्ती धरौटीमा छुटेका छन् ।

सहकारीलाई समस्याग्रस्त बनाएर सम्पर्क विहिन बनेका घर्तीलाई जिल्ला प्रहरी कार्यालय रुपन्देहीले पक्राउ गरेको थियो । घर्तीविरुद्ध ३३५ जना बचतकर्ताले रकम फिर्ताको माग गर्दै जिल्ला प्रहरी कार्यालय रुपन्देहीमा जाहेरी दर्ता गराएका थिए । बुटवल र भैरहवाका ती बचतकर्ताहरुबाट ४ करोड ३६ लाख ६० हजार ४ सय १९ रुपैयाँ फिर्ताको माग गर्दै उजुरी परेको हो ।

जिल्ला अदालत रुपन्देहीले मंगलबार सहकारीका अध्यक्ष घर्तीलाई १२ लाख रुपैयाँ धरौटीमा छाड्न आदेश गरेको छ । यसैगरी सहकारीका मार्केटिङ हेड सुरज ज्ञवालीलाई ३ लाख रुपैयाँ धरौटीमा छाड्न आदेश दिएको श्रेस्तेदार शोभाखर अर्यालले जानकारी दिनुभयो । न्यायधिश महेन्द्रराज काफ्लेको ईजलासले उनीहरुलाई धरौटीमा छाड्न आदेश दिएको बताईएको छ ।

तर यता बचतकर्ताहरुको करोडौं रुपैयाँ अपचलन गरेको आरोप लागेका व्यक्ति धरौटीमा छुटेपछि बचतकर्ताहरु चिन्तित बनेका छन् । फरार भएका सहकारीका अध्यक्ष घर्तीलाई प्रहरीले पक्राउ गरेपछि अब पैसा पाइन्छ भनेर अपेक्षा राखेका बचतकर्ताहरुमा निराशापन छाएको छ । उनीहरुमा अब आफुहरुले पैसा पाउने वा नपाउने अनिश्चित बनेकाले पैसा ड्ब्ने जोखिम बढेको बताएका छन् ।