विदेश जानैपर्छ भन्ने छैन, आफ्नै देशमा पनि सम्भावना र अवसर छन् भन्ने सन्देश दिँदै दुई युवाको व्यावसायिक यात्रा
काठमाडौं । रोजगारी र अवसरको खोजीमा दैनिक हजारौँ युवा विदेशिने क्रम बढिरहेका बेला आफ्नै देशमा सम्भावना खोज्दै व्यवसाय सुरु गर्ने युवाहरूको प्रयास प्रेरणादायी बन्दै गएको छ। यही सोचलाई व्यवहारमा उतार्दै गुल्मीका आविष्कार खत्री र सल्यानका नवराज बुढाथोकीले करिब ३५ लाख रुपैयाँको संयुक्त लगानीमा चन्द्रागिरि नगरपालिका-१५, तीनथानामा ‘चिया थाना क्याफे’ सञ्चालनमा ल्याएका छन्।
सिभिल इन्जिनियरिङ विषयमा अध्ययन गरेका यी दुई युवाले आफ्नो शैक्षिक योग्यता, प्राविधिक ज्ञान र उद्यमशील सोचलाई जोड्दै नयाँ व्यावसायिक यात्रा सुरु गरेका हुन्। उनीहरूको उद्देश्य चिया क्याफे सञ्चालनमा मात्र सीमित छैन, आफ्नो मूल पेसा सिभिल इन्जिनियरिङलाई समेत निरन्तरता दिँदै व्यवसायलाई सँगसँगै अघि बढाउनु हो।
मिसन लुम्बिनी डटकमसँगको कुराकानीमा सञ्चालक आविष्कार खत्रीले नेपालमै बसेर पनि नयाँ सोच, मेहनत र योजनाका साथ काम गर्न सके अवसर सिर्जना गर्न सकिने बताए। उनका अनुसार आफूहरूले सिभिल इन्जिनियरिङ पेसालाई निरन्तरता दिँदै त्यससँगै व्यवसाय सञ्चालन गर्ने उद्देश्य राखेका छन्। आफ्नो सीप र क्षमतालाई प्रयोग गरेर स्वदेशमै केही नयाँ गर्ने सोचका साथ चिया थाना सुरु गरिएको उनले बताए।
खत्रीका अनुसार व्यवसाय सुरु गर्नुको अर्को उद्देश्य युवालाई विदेश जानु नै सफलताको एकमात्र बाटो होइन भन्ने सन्देश दिनु पनि हो। आफ्नै देशमा सम्भावना खोज्ने, जोखिम उठाउने र मेहनत गर्ने हो भने यहाँ पनि अवसरहरू सिर्जना गर्न सकिन्छ भन्ने विश्वासका साथ आफूहरू अघि बढेको उनको भनाइ छ।
करिब ३५ लाख रुपैयाँको लगानीमा सञ्चालनमा आएको चिया थानाले चिया तथा खाजाको स्वादसँगै ग्राहकलाई आत्मीय र सहज वातावरण उपलब्ध गराउने लक्ष्य राखेको छ।
हरियाली वातावरण, खुला आँगन, व्यवस्थित बसाइ, आकर्षक सजावट र पारिवारिक माहोल यसका विशेष आकर्षण हुन्। साथीभाइसँग भेटघाट, पारिवारिक जमघट तथा फुर्सदको समय बिताउन चाहनेहरूका लागि क्याफे उपयुक्त गन्तव्य बन्ने अपेक्षा गरिएको छ।
पछिल्लो समय नेपालमा युवा उद्यमशीलता, स्वरोजगार र आफ्नै व्यवसायप्रतिको आकर्षण बढ्दै गएको छ। तर, धेरै युवाले अवसरको अभाव देखाउँदै विदेशलाई प्राथमिकता दिने गरेका छन्। यस्तो अवस्थामा दुई सिभिल इन्जिनियरको संयुक्त लगानीमा सुरु भएको चिया थानाले प्राविधिक शिक्षा हासिल गरेका युवाले आफ्नो ज्ञान र सीपलाई स्वदेशमै प्रयोग गरेर व्यवसाय विस्तार गर्न सक्छन् भन्ने सकारात्मक सन्देश दिएको छ।
उनीहरूको यो प्रयासले आफ्नो मूल पेसालाई नछोडी त्यससँगै उद्यमशीलता अघि बढाउन सकिने सम्भावनासमेत उजागर गरेको छ। यसले युवालाई जागिरको प्रतीक्षा मात्र नगरी आफैँ अवसर सिर्जना गर्ने सोच विकास गर्न प्रेरित गर्ने देखिन्छ।
विदेश जानु नै सफलताको एकमात्र विकल्प होइन। आफ्नै माटोमा सीप, ज्ञान, लगानी र मेहनत जोड्न सके अवसर सिर्जना गर्न सकिन्छ भन्ने सन्देश चिया थानाका दुई युवा सञ्चालकको प्रयासले दिएको छ।