सर्लाही । नेपाली कांग्रेसका सभापति गगनकुमार थापा छठ पर्वको अवसरमा सर्लाहीको धनकौल गाउँपालिकामा पुगेर स्थानीयसँगै छठ पर्व मनाउनुभएको छ। उहाँले परम्परागत रूपमा छठको ढाकी बोकेर छठ घाट पुग्दै विधिपूर्वक पूजाआजा गर्नुभएको हो।
छठ पर्वको धार्मिक, सांस्कृतिक तथा सामाजिक महत्वलाई आत्मसात् गर्दै सभापति थापा स्वयं छठको ढाकी बोकेर घाट पुग्नुभएको दृश्यले स्थानीयको ध्यान आकर्षित गरेको थियो। उहाँले स्थानीय श्रद्धालु तथा सर्वसाधारणसँगै छठ पूजामा सहभागी भएर पर्वको उल्लासमा साथ दिनुभएको थियो।
यसैक्रममा सभापति थापाले सर्लाहीका विभिन्न स्थानमा रहेका छठ घाटहरूको समेत भ्रमण गर्नुभएको छ। घाट भ्रमणका क्रममा उहाँले छठ पर्व मनाउन भेला भएका स्थानीय नागरिकसँग प्रत्यक्ष भेटघाट र संवाद गर्दै उनीहरूका समस्या, गुनासा तथा सुझाव सुन्नुभएको थियो।
धार्मिक तथा सांस्कृतिक पर्वलाई जनतासँग जोडिने अवसरका रूपमा उपयोग गर्दै थापाले स्थानीय समुदायसँग समय बिताउनुभएको देखिएको छ।
राजनीतिक व्यस्तताबीच स्थानीयको धार्मिक आस्था, परम्परा र संस्कृतिमा सहभागी हुनुभएको उहाँको यस उपस्थितिलाई जनतासँगको सम्बन्ध र सामाजिक सद्भावसँग जोडेर हेरिएको छ।