कपिलवस्तु l नेपालमा यस वर्ष मुस्लिम धर्मावलम्बीहरूको महान् पर्व ईद उल–फित्र शनिबार (चैत ७) मनाइने भएको छ ।
मुस्लिम आयोगले बिहीबार साँझ शवाल महिनाको चन्द्रमा नदेखिएको पुष्टि गर्दै ईदको मिति शनिबारका लागि तय गरेको हो ।
आयोगका कार्यबाहक अध्यक्ष महम्मदीन अलीका अनुसार बिहीबार चन्द्रमा नदेखिएकाले नेपालमा ईद शनिबार नै पर्ने निश्चित भएको हो । उनले सार्वजनिक बिदासम्बन्धी कुनै अन्यौल नराख्न आग्रह गर्दै शनिबार नै पर्व परेकाले सरकारसमक्ष छुट्टै सार्वजनिक बिदा प्रस्ताव नगर्ने स्पष्ट पारे ।
यता, खाडी राष्ट्रहरूमा भने यस वर्ष ईद शुक्रबार मनाइने भएको छ । साउदी अरेबियाको सर्वोच्च अदालतले बुधबार चन्द्रमा नदेखिएको घोषणा गर्दै ३० दिनको रोजा पूरा भएपछि शुक्रबार ईद मनाइने जनाएको छ ।
दुबई, कतार, टर्की, बहराइन र कुवेत लगायतका देशहरूले पनि शुक्रबार नै ईद मनाउने तयारी गरेका छन् । इस्लामिक पात्रो चन्द्रमासमा आधारित हुने भएकाले चन्द्रमा देखिएको आधारमा नयाँ महिना सुरु हुन्छ ।
यही कारण विश्वभर ईद एकै दिन नपरी एक-दुई दिन फरक पर्ने गरेको हो । ईद उल-फित्र मुस्लिम समुदायको प्रमुख पर्व हो, जुन रमजान महिनाको समाप्तिपछि मनाइन्छ । यस अवधिमा रोजा बस्ने, प्रार्थना गर्ने र दान गर्ने परम्परा रहन्छ ।
ईदको दिन बिहान विशेष नमाज अदा गरिन्छ र त्यसअघि ‘जकात-उल-फित्र’ दान गरिन्छ । नेपालमा विशेष गरी नेपालगञ्ज, वीरगञ्ज, विराटनगर, कपिलवस्तु, रुपन्देही, नवलपरासी र काठमाडौं लगायतका क्षेत्रमा ईदको विशेष रौनक देखिन्छ ।
यस अवसरमा सेवइ, खीरजस्ता मिठा परिकार तयार पारिन्छन् र आफन्तबीच भेटघाट तथा शुभकामना आदानप्रदान गरिन्छ । बहुसांस्कृतिक समाजमा ईदले आपसी सद्भाव, सहिष्णुता र भाइचाराको सन्देश फैलाउने विश्वास गरिएको छ ।
