कपिलवस्तु l कपिलवस्तु जिल्लाको बुद्धभूमि नगरपालिका–२ गोरुसिंगेबाट राजस्व छली गरी ल्याइएको ठूलो परिमाणको सामानसहित ट्रक प्रहरीले नियन्त्रणमा लिएको छ।
जिल्ला प्रहरी कार्यालय कपिलवस्तुका अनुसार पश्चिमबाट पूर्वतर्फ ल्याइँदै गरेको ना ६ ख ३९७७ नम्बरको ट्रकमा करिब ६० लाख ४१ हजार ५ सय ४८ रुपैयाँ बराबरका कपडा, जुत्ता, जिरा र खुर्सानी लगायतका सामग्रीमा राजस्व छली गरिएको आशंकामा कारबाही गरिएको हो।
सोही घटनामा दाङको घोराही उप–महानगरपालिका–३ निवासी छबीलाल घर्ती मगरलाई समेत प्रहरीले नियन्त्रणमा लिएको छ। गोप्य सूचनाका आधारमा गरिएको जाँचका क्रममा सामानको मूल्य फरक देखिएकोले ट्रकसहित बरामद गरिएको प्रहरीले जनाएको छ।
ट्रकको मूल्य करिब ७० लाख रुपैयाँ कायम गरिएको छ। प्रहरी नायब उपरीक्षक रिपेन्द्र कुमार सिंहका अनुसार नियन्त्रणमा लिइएको ट्रक र सामान आवश्यक अनुसन्धान तथा कारबाहीका लागि राजस्व अनुसन्धान कार्यालय बुटवल पठाइएको छ।
