बुटवल l नेपाल पत्रकार महासंघ रुपन्देहीको आयोजनामा आजदेखि बुटवलमा ‘मिडिया मन्थन’ तथा ‘राष्ट्रिय सञ्चार सम्मेलन–२०८३’ सुरु भएको छ।
बुटवल उद्योग वाणिज्य संघको सभाहलमा आयोजना गरिएको सम्मेलनमा सञ्चार क्षेत्रका समसामयिक चुनौती, स्थानीय मिडियाको भविष्य, डिजिटल प्लेटफर्मको प्रभाव, पर्यटन प्रवर्द्धन, आर्थिक संकट र मिडिया नीतिलगायत विषयमा गहन छलफल हुने आयोजकले जनाएको छ।
आज शनिबारदेखि सुरु भएको ‘मिडिया मन्थन’ अन्तर्गत “कसरी बचाउने स्थानीय मिडिया ?”, “स्थानीय सरकारः के गर्दैछन्, के गर्नुपर्छ ?” तथा “कसरी उभो लाग्छ उद्योग व्यवसाय ?” विषयमा बहस भइरहेको छ।
त्यस्तै, वैशाख २७ गते आइतबार बिहान ७ बजेदेखि सुरु हुने दोस्रो चरणको कार्यक्रममा “लुम्बिनीको पर्यटनः पर्यटक र पैसा कसरी भित्राउने ?”, “आर्थिक संकटमा मिडिया, अबको बाटो”, “प्रश्नको घेरामा मिडिया”, “परम्परागत मिडियामाथि डिजिटल प्लेटफर्मको चुनौती”, “मिडियाकर्मीः वाचडग कि राजनीतिक खेलाडी ?” तथा “मिडिया नीति कस्तो हुनुपर्छ ?” जस्ता महत्वपूर्ण विषयमा बहस गरिनेछ।
वैशाख २८ गते सोमबार बिहान ८ः१५ बजेदेखि राष्ट्रिय सञ्चार सम्मेलन आयोजना हुने कार्यक्रम रहेको महासंघ रुपन्देहीका अध्यक्ष दिनेश पाण्डेले जानकारी दिएका छन्।
आयोजकका अनुसार सम्मेलनले बदलिँदो सञ्चार परिवेशमा नेपाली मिडियाले सामना गरिरहेका चुनौती र अवसरबारे साझा निष्कर्ष निकाल्दै नीतिगत बहसलाई समेत अघि बढाउने अपेक्षा गरिएको छ।
