काठमाडौं । गायक सविन श्रेष्ठको नयाँ गीत ‘कल्पना’ आइतबार २९ रिसोर्ट एन्ड फार्म हाउसमा एक विशेष समारोहका बीच प्रिमियर गर्दै सार्वजनिक गरिएको छ। स्वर, शब्द तथा संगीत सविनकै रहेको यस गीतले बितिसकेको चोखो मायाको सम्झना र त्यसले निम्त्याउने नोस्टाल्जियालाई कलात्मक रूपमा कैद गरेको छ। प्रेमिकाले पवित्र सम्बन्ध त्यागेर गए पनि पुराना सम्झना र योजनाहरूलाई अझै उस्तै निश्चल रूपमा जीवित राखेको कथा गीतले भन्छ। प्रिमियरमा भावुक बन्दै गायक सविनले यो गीत केवल लयबद्ध शब्द मात्र नभएर आफ्नो गम्भीर दुर्घटना (एक्सिडेन्ट) पछि एक्लोपन, मानसिक तनाव र फ्रस्टेसनका बेला कसैसँग भावना पोख्न नसकेर जन्मिएका मनका भित्री रोदन भएको खुलासा गरे।
समारोहमा उपस्थित कलाकर्मीहरूले गायक सविनको बलियो इच्छाशक्ति र सिर्जनशीलताको उच्च प्रशंसा गरेका छन्। भिडियोका मोडल सुजन जिम्बाले सविनलाई हौसला र प्रेरणाको अथाह स्रोतका रूपमा चित्रण गरे भने प्रिमियरमा अतिथिका रूपमा सहभागी चर्चित अभिनेता मुकुन भुसालले सविनको सांगीतिक यात्रा र सिर्जनाबाट प्रभावित भएर आगामी दिनमा उनीसँग प्रत्यक्ष रूपमा सहकार्य गर्न आफू सधैँ तयार रहेको प्रतिबद्धता जनाए। यस्तै, भिडियोका निर्देशक तथा कलाकार सम्राट अधिकारीले सविनको मनभित्रको गहिरो 'कल्पना' र भावनालाई आफूले भिडियोमार्फत न्यायपूर्वक पर्दामा उतार्ने अधिकतम प्रयास गरेको बताए।
नुजा पिक्चर्सको प्रस्तुति र कथा क्रिएसनको ब्यानरमा निर्माण भएको यस उत्कृष्ट म्युजिक भिडियोलाई दिमेश श्रेष्ठले निर्माण गरेका हुन्। भिडियोमा सुजन जिम्बा, सृष्टि सुब्बा र सम्राट अधिकारीको जीवन्त अभिनय हेर्न सकिन्छ। नेपाली सुगम संगीतका प्रख्यात सिनेमाटोग्राफर उत्सव दाहालले खिचेको यस भिडियोलाई विकास दाहालले आकर्षक रूपमा सम्पादन गरेका छन्, जसले गीतको मर्म र भावनालाई अझ बढी न्याय गरेको छ।
