अर्घाखाँची । अर्घाखाँची र कपिलवस्तुको सिमानामा अवस्थित ‘भाइरल शिव पहाड’ पछिल्लो समय आन्तरिक पर्यटनको आकर्षक गन्तव्यका रूपमा उदाउँदै गएको छ । प्राकृतिक सौन्दर्य, धार्मिक आस्था र सामाजिक सञ्जालको प्रभावले यो स्थान छोटो समयमै देशभर चर्चित बन्न सफल भएको हो ।
महेन्द्र राजमार्ग हुँदै पूर्व–पश्चिम यात्रा गर्ने अधिकांश यात्रुहरू अहिले यो पहाडमा केहीबेर गाडी रोकेर फोटो तथा भिडियो खिच्न छुटाउँदैनन् । मनमोहक दृश्य, शान्त वातावरण र अनौठो चट्टानी बनावटका कारण यहाँ पर्यटकको चहलपहल दिनप्रतिदिन बढिरहेको छ ।
कपिलवस्तुको वनकसबासा र धानखोलाको बीचमा पर्ने चुरे क्षेत्रमा अवस्थित यो पहाड अर्घाखाँचीको शीतगंगा नगरपालिका–११ तथा कपिलवस्तुको शिवराज नगरपालिका–१ मा फैलिएको छ । केही वर्षअघिसम्म सामान्य चट्टानी पहाडका रूपमा चिनिने यो क्षेत्र अहिले दैनिक सयौँ आन्तरिक पर्यटकको रोजाइमा परेको छ ।
महेन्द्र राजमार्ग निर्माणका क्रममा चट्टानी पहाड काटेर सडक विस्तार गरिएपछि बनेको यो भूआकृति सुरुमा खासै चर्चामा थिएन । तर यहाँ खिचिएका आकर्षक तस्बिर र भिडियो फेसबुक, टिकटक लगायत सामाजिक सञ्जालमा भाइरल हुन थालेपछि यसको परिचय व्यापक रूपमा फैलिएको हो ।
यहाँ पुग्ने पर्यटकहरू प्राकृतिक दृश्यावलोकनसँगै सामाजिक सञ्जालका लागि आकर्षक सामग्री सिर्जना गर्न व्यस्त देखिन्छन् । चट्टानी संरचना, हरियाली वातावरण र माथिबाट देखिने मनोरम दृश्यले आगन्तुकलाई लोभ्याउने गरेको छ ।
यस पहाडको अर्को विशेषता यसको धार्मिक स्वरूप पनि हो । स्थानीयवासी तथा शिवराज नगरपालिकाको पहलमा यहाँ भगवान् शिवको चित्र कोर्ने, नागको मूर्ति स्थापना गर्ने तथा विभिन्न शिवलिङ्ग राख्ने कार्य गरिएको छ । धार्मिक तथा पर्यटकीय महत्वको संगम बनेपछि ‘भाइरल शिव पहाड’ अहिले यात्रु तथा पर्यटकका लागि नयाँ आकर्षणको केन्द्र बनेको छ ।