काठमाडौँ । नेपाली कांग्रेस केन्द्रीय अनुशासन समितिले ले मधेस प्रदेशका ३ प्रदेशसभा सदस्यलाई सचेत गराएको छ ।
बिहीबार बसेको समिति बैठकले सर्लाही जिल्ला क्षेत्र नम्बर २ का तीन जना प्रदेश सभा सदस्यहरूलाई समितिले सजगताका साथ पार्टीको जिम्मेवारी पूरा गर्न निर्देशन दिएको हो ।
निर्वाचनमा पार्टी उम्मेदवारलाई असहयोग गरेको आरोप लागेका सकुन्ती देवी महरा, कौशल किशोर राय र जंगीलाल रायले आफूमाथिको आरोप निराधार रहेको भन्दै स्पष्टीकरण बुझाएका थिए।
उनीहरूको स्पष्टीकरण चित्तबुझ्दो भए पनि समितिले आगामी दिनमा कुनै गुनासो नआउने गरी पार्टीको विधान र नियमावलीप्रति प्रतिबद्ध रही पदीय जिम्मेवारी निर्वाह गर्न उनीहरूलाई निर्देशन दिएको छ।
बाराका उपसभापतिलाई सफाइ
बारा जिल्ला कार्यसमितिका उपसभापति अमिरीलाल राउतले भने अनुशासन उल्लङ्घनको आरोपबाट सफाइ पाएका छन् ।
उनले बुझाएको स्पष्टीकरण सन्तोषजनक रहेको र मिसिल संलग्न कागजात अध्ययन गर्दा थप कारबाही गर्नुपर्ने अवस्था नदेखिएको भन्दै समितिले उनलाई सफाइ दिने निर्णय गरेको हो।
पार्टी केन्द्रीय कार्यालय सानेपामा बसेको समिति बैठकले पार्टीको आधिकारिक उम्मेदवारलाई अन्तरघात गरेको आरोपमा बारा जिल्ला सभापति राजेश राय यादवलाई पदबाट निलम्बन गरेको छ ।
संयोजक तारामान गुरुङको अध्यक्षतामा सोमबार बसेको समितिको बैठकले यादवलाई निलम्बन गर्ने निर्णय गरेको हो ।
