काठमाण्डाै – सुकुम्वासीकाे समस्यालाई लिएर चर्को विरोध हुन थालेपछि आज सङ्घ सरकारका ६ जना मन्त्रीले भक्तपुरमा रहेको होल्डिङ सेन्टरको अवलोकन गर्नुभएको छ ।
गृहमन्त्री सुधन गुरुङ, भूमिमन्त्री प्रतिभा रावल, महिला तथा बालबालिका मन्त्री सीता वादी, स्वास्थ्यमन्त्री निशा मेहता, शिक्षामन्त्री सस्मित पोख्रेल र श्रममन्त्री रामजी यादवले खरिपाटी र बोडेमा रहेका होल्डिङ सेन्टरको अवलोकन गर्नुभएको हो ।
हिजो बिहान कीर्तिपुरको होल्डिङ सेन्टर डुबानमा परेपछि त्यहाँ रहेका सुकुम्वासीलाई पनि खरिपाटीको होल्डिङ सेन्टरमा राखिएको छ । केही समयदेखि सुकुम्वासीलाई खानासमेत नदिएको भन्दै विरोध भइरहेकोमा हिजो बिहान कीर्तिपुरको सेन्टर डुबानमा परेपछि सुकुम्वासीको समस्यालाई लिएर सरकारप्रतिको असन्तुष्टि झनै बढेको हो ।
सुकुम्वासीसँगको भेटमा भूमिमन्त्री रावलले सरकारले सक्दो चाँडो सुकुम्वासीलाई लालपुर्जा वितरण गर्ने बताउनुभयो । लालपुर्जा दिँदा कसैले पनि प्रश्न उठाउन नसक्ने गरी दिने तयारी गरेको र यही कारण समय लागेको उहाँको भनाइ छ । यो मितिमा दिन्छु नभन्ने तर सुकुम्वासीले सक्दो चाँडो लालपुर्जा पाउने उहाँको भनाइ छ ।
यसैबीच संयुक्त राष्ट्रिय सुकुम्वासी मोर्चाले काठमाण्डाैको माइतीघरमा प्रदर्शन गरेको छ । उचित व्यवस्थापनविना सुकुम्वासी बस्ती भत्काएर उठीबास लगाएको उनीहरूको आरोप छ ।
