नेपाली कांग्रेसका सभापति गगनकुमार थापाले पार्टीभित्रको विवाद समाधान गरी एकता कायम गर्ने प्रयास सहमतिउन्मुख रहेको बताएका छन्।
आइतबार नेपाल नगरपालिका संघका अध्यक्ष भीम ढुंगानाको नेतृत्वमा कांग्रेसबाट निर्वाचित स्थानीय जनप्रतिनिधिहरूसँग भएको भेटमा उनले पार्टी एकताका लागि चार सदस्यीय कार्यदल गठन गर्ने जानकारी दिए।
थापाले वर्तमान राजनीतिक चुनौती सामना गर्न पार्टी एकता अपरिहार्य रहेको उल्लेख गर्दै मतभेद बढाउने गतिविधि नगर्न सबैलाई आग्रह गरे। साथै, साउन १६ गते तय गरिएको पार्टी एकताका लागि दबाब अभियानको राष्ट्रिय भेला स्थगित गर्न आग्रह गर्दै सहमतिका विषयहरूलाई सूक्ष्म रूपमा टुंग्याउनुपर्ने बताए।
भेटका क्रममा स्थानीय जनप्रतिनिधिहरूले पार्टी एकता नभए जनतामाझ सकारात्मक सन्देश दिन नसकिने र आवश्यक परे पदबाट राजीनामा दिनेसम्मको चेतावनी दिएका थिए। त्यसको जवाफमा सभापति थापाले त्यस्तो अवस्था आउन नदिने र साउनको तेस्रो सातासम्म सहमति हुने विश्वास व्यक्त गरेका छन्।
स्थानीय जनप्रतिनिधिहरूले पार्टी एकताको पक्षमा आफ्नो खबरदारी जारी राख्ने र आगामी कदमबारे थप छलफल गरेर निर्णय गर्ने बताएका छन्।
