काठमाडौं । नेपाली कांग्रेसका सभापति गगन थापाले पार्टीका सबै तहका समिति, नेता तथा कार्यकर्ताहरूलाई संयमित, जिम्मेवार र जनउत्तरदायी भूमिका निर्वाह गर्न निर्देशन दिएका छन्।
तराई मधेशमा धार्मिक हिंसा भड्किएपछि सभापति थापाले काठमाडौंमा उपलब्ध पदाधिकारीसहित कोशी र मधेशका प्रदेश सभा सदस्य र स्थानीय जनप्रतिनिधिसँग भर्चुअल बैठक राखेका थिए।
बैठकमा सभापति थापाले देशमा सामाजिक सद्भाव, शान्ति र आपसी विश्वास कायम राख्नु आजको सबैभन्दा ठूलो जिम्मेवारी भएको बताए।
उनले भने, ‘पार्टीका सबै तहका समिति, नेता तथा कार्यकर्ताहरूलाई संयमित, जिम्मेवार र जनउत्तरदायी भूमिका निर्वाह गर्नुपर्छ। हिंसा, तोडफोड, आगजनी वा कानूनविपरीत कुनै पनि गतिविधिमा संलग्न हुने व्यक्तिलाई नेपाली कांग्रेसले कुनै पनि हालतमा संरक्षण गर्दैन। यस्ता कार्यमा संलग्न पार्टी सदस्य वा कार्यकर्तालाई पनि पार्टीले क्षमा गर्दैन।’
निर्वाचनमा हार–जित लोकतान्त्रिक प्रक्रियाको स्वाभाविक पक्ष भएकाले अहिले सरकारलाई सहयोग गर्नुपर्ने उनको भनाइ थियो।
उनले थपे, ‘राष्ट्र, लोकतन्त्र, संविधान र सामाजिक सद्भावको रक्षा गर्नु नेपाली कांग्रेसको ऐतिहासिक दायित्व हो। सरकार जुनसुकै दलको भए पनि देशमा शान्ति कायम राख्न सहयोग गर्नु सबैको कर्तव्य हो। दोषीमाथि निष्पक्ष र कडा कारबाही, घाइतेहरूको उपचार र पीडितलाई न्याय दिलाउन सरकारसँग हाम्रो स्पष्ट माग छ।’
देशमा लागेको कुनै पनि हिंसा र द्वन्द्वको आगो निभाउँदै राष्ट्रिय एकता, मेलमिलाप र सामाजिक सद्भाव कायम राख्ने ऐतिहासिक जिम्मेवारी कांग्रेसले सधैँ निभाएको बताए।
