काठमाडौं । नक्कली भुटानी शरणार्थी प्रकरणमा प्रहरीले नेपाल हज समितिका अध्यक्ष शमशेर मियालाई पक्राउ गरेका छन् । प्रहरीले बिहीबार ऊर्जा मन्त्रालयबाट मियालाई पक्राउ गरेको हो।
सोही प्रकरणमा पक्राउ परेका एमालेका सचिव टोपबहादुर रायमाझीका प्रिय पात्र मानिने मिया शरणार्थी प्रकरणमा प्रहरीले आफूलाई खोजेको सुराक पाएपछि फरार भएका थिए । मियाले नक्कली भुटानी शरणार्थी प्रकरणमा मानिसहरूसँग पैसा उठाउने र ठगी गर्ने गिरोहलाई सरकारी गाडी उपलब्ध गराएको प्रहरीले जनाएको छ ।
प्रहरीले नक्कली भुटानी शरणार्थी प्रकरणमा हालसम्म पूर्व गृहमन्त्री बालकृष्ण खाँण,पूर्व उपप्रधानमन्त्री तथा नेकपा एमालेका सचिव टोपबहादुर रायमाझी,पूर्व गृह सचिव टेकनारायण पाण्डे,पूर्वगृहमन्त्री रामबहादुर थापाको सुरक्षा सल्लाहकार इन्द्रजित राई,केशव प्रसाद दुलाल, सानु भण्डारी, टंक कुमार गुरूङ,संदिप रायमाझी,सागर राई सहित १२ जनालाई पक्राउ गरिसकेका छन् ।
