काठमाडौं । राष्ट्रिय स्वतन्त्र पार्टी (रास्वपा)ले पार्टीको प्रवक्तामा जगदीश खरेललाई मनोनित गरेको छ। शुक्रबार बसेको केन्द्रीय समिति बैठकले सभापति रवि लामिछानेको प्रस्तावमा खरेललाई प्रवक्ताको जिम्मेवारी दिएको हो।
बैठकले पार्टीको सांगठनिक संरचनालाई पूर्णता दिने क्रममा विभिन्न पदमा नयाँ जिम्मेवारीसमेत तोकेको छ। जसअनुसार कोषाध्यक्षमा डा. मनोहर प्रधान र सहकोषाध्यक्षमा बसुमाया तामाङ मनोनित भएका छन्।
त्यस्तै, सहमहामन्त्रीमा पुरुषोत्तम यादव तथा सहप्रवक्तामा ननिता यादव र सुरेन्द्र चौधरी मनोनित भएका छन्। संगठनलाई थप व्यवस्थित बनाउने उद्देश्यले संगठन विभाग प्रमुखमा प्रमोद न्यौपानेलाई जिम्मेवारी दिइएको छ।
रास्वपाले पछिल्लो समय पार्टीको सांगठनिक संरचना विस्तार र जिम्मेवारी बाँडफाँटलाई तीव्रता दिएको छ। शुक्रबारको बैठकबाट विभिन्न पदमा भएको मनोनयनले पार्टीको आन्तरिक संगठनलाई थप सक्रिय बनाउने अपेक्षा गरिएको छ।
यद्यपि, पार्टीको सांगठनिक संरचनाका केही महत्वपूर्ण पद अझै रिक्त छन्। रास्वपामा एक उपसभापति, एक महामन्त्री र एक सहमहामन्त्री मनोनित हुन बाँकी रहेको जनाइएको छ।
बाँकी पदमा कसलाई जिम्मेवारी दिने भन्ने विषयमा आगामी बैठकबाट निर्णय हुने सम्भावना छ। पछिल्लो मनोनयनसँगै पार्टीको नेतृत्व संरचना विस्तार हुँदै गएपछि रास्वपाको आगामी राजनीतिक तथा संगठनात्मक अभियान थप व्यवस्थित हुने अपेक्षा गरिएको छ।
