काठमाडौं। रसुवाको भोटेकोशी नदीमा आएको भीषण बाढीपछि रसुवागढी जलविद्युत् आयोजना (आरएचपीएल) को सुरुङभित्र फसेको आशंका गरिएका कामदारको खोजीमा खटिएको नेपाली सेनाको टोली फर्किएको छ।
प्रधानमन्त्री बालेन्द्र शाहको सचिवालयका अनुसार नेपाली सेनाको नेतृत्वमा इन्जिनियर तथा ड्रोन टोलीसहित सुरुङभित्र विस्तृत खोजी गरिएको थियो। टोलीले सुरुङको भित्री भाग हुँदै अन्तिम बिन्दुसम्म पुगेर ड्रोनमार्फत समेत निरीक्षण गरेको थियो।
तर, लामो समयसम्म गरिएको खोजीका क्रममा सुरुङभित्र कुनै पनि मानिसको उपस्थिति फेला नपरेको सचिवालयले जनाएको छ।
भोटेकोशी नदीमा आएको बाढीपछि आयोजनाको सुरुङमा कामदार फसेको हुनसक्ने आशंका गरिएको थियो। त्यसपछि नेपाली सेनाको उद्धार टोलीलाई तत्काल खोजी तथा उद्धारका लागि परिचालन गरिएको थियो।
सुरुङको अन्तिम भागसम्म पुगेर प्रत्यक्ष निरीक्षण तथा ड्रोनबाट समेत खोजी गर्दा मानवीय उपस्थिति नभेटिएपछि सुरुङभित्र कोही पनि नरहेको निष्कर्षसहित नेपाली सेनाको टोली रसुवाको धुन्चे फर्किएको प्रधानमन्त्रीको सचिवालयले जनाएको छ।
यस घटनाले बाढीपछि आयोजनाको सुरुङमा कामदार फसेको हुनसक्ने आशंकाबीच गरिएको खोजी अभियान तत्कालका लागि टुंगिएको छ।
