कपिलवस्तु । कपिलवस्तुमा चार युवा उद्यमीको संयुक्त लगानीमा होन्डा मोटरसाइकलको आधिकारिक शोरुम र कङ्क्रिट ब्लक उद्योग सञ्चालनमा आएका छन्। स्थानीय लगानीमार्फत व्यवसाय र उत्पादनमूलक उद्योग विस्तार भएसँगै जिल्लामा युवा उद्यमशीलता र रोजगारीका नयाँ अवसर सिर्जना हुने अपेक्षा गरिएको छ।
कपिलवस्तु नगरपालिका–१ नयाटोलमा नेपाल श्री ट्रेडर्सको आधिकारिक होन्डा शोरुम तथा वडा नं. ६ गौबरीमा कपिलवस्तु कङ्क्रिट ब्लक उद्योग सञ्चालनमा आएको हो। दुवै संस्थाको उद्घाटन लुम्बिनी प्रदेश सरकारका आन्तरिक मामिला, कानुन, उद्योग तथा यातायातमन्त्री भण्डारीलाल अहिरले गरेका हुन्।
उद्घाटन कार्यक्रममा मन्त्री अहिरले स्थानीय युवाको लगानीमा उद्योग तथा व्यवसाय सञ्चालन हुनु जिल्लाको आर्थिक विकासका लागि सकारात्मक संकेत भएको बताए। यस्ता उद्यमले स्थानीय स्तरमै रोजगारी सिर्जना गर्नुका साथै आर्थिक गतिविधि र व्यवसायिक अवसर विस्तारमा महत्वपूर्ण योगदान पुर्याउने उनको भनाइ थियो।
नेपाल श्री ट्रेडर्समा अनुपकुमार पाण्डे, देवेश जैसवाल, रत्नाकर शुक्ला र इश्तेखार अहमद खान गरी चार युवा व्यवसायी साझेदार छन्। शोरुमबाट होन्डाका विभिन्न मोडलका मोटरसाइकल तथा स्कुटर बिक्रीका साथै स्पेयर पार्ट्स र सर्भिसिङ सुविधा समेत उपलब्ध हुने सञ्चालकले बताएका छन्। यसले जिल्लाका ग्राहकलाई सवारीसाधन खरिददेखि मर्मतसम्भारसम्मको सेवा स्थानीयस्तरमै उपलब्ध गराउने अपेक्षा गरिएको छ।
त्यस्तै, गौबरीमा सञ्चालनमा आएको कपिलवस्तु कङ्क्रिट ब्लक उद्योगले निर्माण क्षेत्रमा आवश्यक विभिन्न सामग्री उत्पादन गर्ने जनाएको छ। उद्योगबाट इन्टरलक इँटा, मिलेट इँटा, जिगज्याग इँटा, युनिटी पेभर इँटालगायतका कङ्क्रिटजन्य निर्माण सामग्री उत्पादन हुने बताइएको छ।
यसै अवसरमा मन्त्री अहिरले तौलिहवास्थित यातायात कार्यालयको निरीक्षणसमेत गरेका थिए। निरीक्षणका क्रममा स्थानीय जनप्रतिनिधिले कपिलवस्तुमै ट्रायलसहितको सवारी चालक अनुमतिपत्र सेवा र नयाँ लाइसेन्स वितरण प्रभावकारी रूपमा सञ्चालन गर्न माग गरेका थिए।
मन्त्री अहिरले जिल्लामै ट्रायल परीक्षा सञ्चालन तथा नयाँ सवारी चालक अनुमतिपत्र वितरणसम्बन्धी सेवा उपलब्ध गराउन आवश्यक पहल गर्ने प्रतिबद्धता जनाए।
होन्डाका लुम्बिनी रिजनल म्यानेजर राजाराम खन्नासहित स्थानीय व्यवसायी तथा सरोकारवालाको उपस्थितिमा भएको कार्यक्रममा कपिलवस्तुमा स्थानीय लगानी, युवा उद्यमशीलता र उत्पादनमूलक व्यवसाय विस्तारको सम्भावना बढ्दै गएको सन्देश देखिएको छ।
