काठमाडौं  l बाढी तथा पहिरोबाट प्रभावित रसुवा र नुवाकोट जिल्लाको स्थलगत अवलोकन गर्दै प्रहरी महानिरीक्षक दानबहादुर कार्कीले विपद्को समयमा प्रहरी संगठनको पहिलो प्राथमिकता नागरिकको जीवन रक्षा, खोज तथा उद्धार र सुरक्षित पुनःस्थापना भएको बताएका छन्।

प्रहरी महानिरीक्षक कार्कीले प्रभावित क्षेत्रको स्थलगत अवस्था निरीक्षण गर्नुका साथै विपद्को समयमा अग्रपंक्तिमा खटिएका प्रहरी कर्मचारीहरूको कामको प्रत्यक्ष अवलोकन गरेका छन्। उनले खोज तथा उद्धारमा परिचालित प्रहरी कर्मचारीहरूलाई आवश्यक निर्देशन दिँदै उच्च मनोबलका साथ जिम्मेवारी निर्वाह गर्न हौसला प्रदान गरेका थिए।

भौगोलिक कठिनाइ, अवरुद्ध सडक तथा जोखिमपूर्ण परिस्थितिका बीच पनि प्रहरी कर्मचारीहरू निरन्तर उद्धार कार्यमा खटिरहेका छन्। यस्तो अवस्थामा घटनास्थलको वास्तविक अवस्था बुझ्न प्रहरी नेतृत्व स्वयं प्रभावित क्षेत्रमा पुग्नुले उद्धारमा खटिएका सुरक्षाकर्मीको मनोबल थप उच्च बनाएको छ।

स्थलगत निरीक्षणका क्रममा आईजीपी कार्कीले उद्धार कार्यलाई प्रभावकारी, समन्वयात्मक र जोखिमको सही मूल्याङ्कनसहित अघि बढाउन निर्देशन दिएका थिए। सम्भावित जोखिम भएका क्षेत्रमा विशेष सतर्कता अपनाउन तथा उद्धारमा खटिँदा प्रहरी कर्मचारीको सुरक्षालाई समेत प्राथमिकतामा राख्न उनले जोड दिएका छन्।

नागरिकको जीवन रक्षा पहिलो प्राथमिकता

विपद्का बेला प्रहरीको भूमिका केवल उद्धारमा सीमित नभई प्रभावित नागरिकलाई सुरक्षित स्थानमा स्थानान्तरण गर्ने, जोखिम क्षेत्र पहिचान गर्ने, राहत वितरणमा सहजीकरण गर्ने तथा स्थानीय प्रशासन र अन्य सुरक्षा निकायसँग समन्वय गर्ने कार्यसम्म फैलिएको छ।

रसुवा र नुवाकोटमा भएको स्थलगत अवलोकनमार्फत प्रहरी महानिरीक्षक कार्कीले ‘विपद्को समयमा प्रहरी नागरिकको साथमा छ’ भन्ने सन्देशसमेत दिएका छन्।

प्राकृतिक विपद्का कारण उत्पन्न कठिन परिस्थितिमा समेत आफ्नो ज्यानको जोखिम मोलेर नागरिकको उद्धारमा खटिएका प्रहरी कर्मचारीलाई आईजीपी कार्कीले धन्यवाद दिँदै उनीहरूको योगदानको प्रशंसा गरेका थिए।

नेतृत्व घटनास्थलमै पुग्दा बढ्यो मनोबल

विपद् प्रभावित क्षेत्रमा प्रहरी नेतृत्वको प्रत्यक्ष उपस्थितिले उद्धारमा खटिएका प्रहरी कर्मचारीलाई थप जिम्मेवारीबोध र ऊर्जा दिएको छ। फिल्डमा खटिएका प्रहरीसँग प्रत्यक्ष संवाद गर्दै आईजीपी कार्कीले समस्या र आवश्यकताबारे जानकारी लिनुका साथै तत्काल आवश्यक पर्ने सहयोग र समन्वयका विषयमा समेत चासो राखेका थिए।

प्रहरी संगठनले विपद्को अवस्थामा तत्काल प्रतिक्रिया, खोज तथा उद्धार र नागरिक सुरक्षालाई केन्द्रमा राखेर काम गर्ने प्रतिबद्धता दोहोर्‍याउँदै आएको छ। आईजीपी कार्कीको रसुवा र नुवाकोट भ्रमणले यही प्रतिबद्धतालाई व्यवहारमै देखाउने प्रयासका रूपमा हेरिएको छ।

विपद्को घडीमा नेतृत्वको उपस्थिति, उद्धारकर्मीको मनोबल र नागरिकको सुरक्षालाई केन्द्रमा राखिएको प्रहरीको सक्रियताले राज्यको उद्धार संयन्त्रलाई थप प्रभावकारी बनाउन महत्वपूर्ण भूमिका खेल्ने देखिन्छ।