नुवाकोट। भोटेकोसी हुँदै त्रिशूली नदीमा आएको विनाशकारी बाढीबाट प्रभावित विदुर नगरपालिकामा हैजाको संक्रमण फैलिन नदिन हैजाविरुद्धको खोप अभियान सुरु गरिएको छ।
बाढीपछि दूषित पानी तथा खानेकुराका कारण हैजा फैलिन सक्ने जोखिम बढेपछि नगरपालिकाले संक्रमण रोकथामलाई प्राथमिकता दिँदै भदौ २५ गतेदेखि खोप अभियान सञ्चालन गरेको हो। अभियान भदौ २९ गतेसम्म नगरपालिकाका सबै वडाका तोकिएका खोप केन्द्रमार्फत सञ्चालन हुने जनाइएको छ।
नगरपालिकाका अनुसार एक वर्ष उमेर पूरा भएका बालबालिकादेखि अन्य व्यक्तिसम्मले खोप लगाउन सक्नेछन्। बाढी प्रभावित क्षेत्रमा खानेपानी तथा सरसफाइमा समस्या देखिन सक्ने भएकाले सम्भावित संक्रमण नियन्त्रणका लागि खोप अभियानलाई प्रभावकारी रूपमा अघि बढाइएको हो।
खोप अभियानमा विदुर नगरपालिकाका नगरप्रमुख राजन श्रेष्ठसमेत सहभागी भएका छन्। उनले बाढी प्रभावित क्षेत्रमा हैजा तथा अन्य पानीजन्य रोगको जोखिम कायम रहेकाले नगरवासीलाई सचेत रहन आग्रह गरेका छन्।
नगरप्रमुख श्रेष्ठले संक्रमणबाट जोगिन नगरपालिकाले सञ्चालन गरेको अभियानमा सहभागी भई सबैले हैजाविरुद्धको खोप लगाउन आग्रह गरेका छन्। साथै, सुरक्षित खानेपानीको प्रयोग, खाना सफा राख्ने तथा व्यक्तिगत सरसफाइमा विशेष ध्यान दिनसमेत उनले नगरवासीलाई अनुरोध गरेका छन्।
बाढीपछि सिर्जित स्वास्थ्य जोखिमलाई मध्यनजर गर्दै सञ्चालन गरिएको खोप अभियानले सम्भावित हैजा संक्रमण नियन्त्रणमा सहयोग पुग्ने अपेक्षा गरिएको छ।
