भक्तपुर । भोटेकोशी बाढीबाट घरबारविहीन भएका नागरिकको दीर्घकालीन पुनर्वासका लागि वाग्मती प्रदेश सरकारले स्थायी बस्ती निर्माण गर्ने भएको छ।
वाग्मती प्रदेशका मुख्यमन्त्री किरण थापामगरले स्थानीय तहले उपलब्ध गराउने जग्गामा प्रदेश सरकारले बाढीपीडितका लागि घर तथा बस्ती निर्माण गर्ने तयारी भइरहेको जानकारी दिएका छन्। त्रिशूली नदीको दायाँ–बायाँ क्षेत्रमा अब बस्ती बसाउन नहुने भन्दै उनले सुरक्षित स्थानमा पीडितको पुनर्वास गर्ने नीति प्रदेश सरकारले अघि सारेको बताए।
उनका अनुसार घरबार गुमाएका नागरिकलाई दीर्घकालीन रूपमा सुरक्षित आवास उपलब्ध गराउने उद्देश्यले स्थानीय तह र प्रदेश सरकारबीच सहमति भएको छ। स्थानीय तहले जग्गा उपलब्ध गराउने र प्रदेश सरकारले आवश्यक पूर्वाधारसहित बस्ती निर्माण गर्ने योजना अघि बढाइएको हो।
मुख्यमन्त्री थापामगरले नुवाकोटका बाढीपीडितका लागि विदुर नगरपालिकामा जग्गा उपलब्ध गराउने सहमति भइसकेको र रसुवाका प्रभावितका लागि भने उपयुक्त जग्गाको खोजी भइरहेको बताए।
प्रदेश सरकारले बाढी तथा अन्य विपद्बाट प्रभावित नागरिकका लागि स्थायी आवास निर्माणलाई पहिलो प्राथमिकता दिएको उनको भनाइ छ। पुनर्वाससँगै प्रभावित परिवारलाई रोजगारीको अवसर सिर्जना गर्ने तयारीसमेत भइरहेको उनले बताए।
उद्योग वाणिज्य महासंघ तथा निजी क्षेत्रका उद्योगी–व्यवसायीसँग सहकार्य गरी प्रभावित परिवारका सदस्यलाई रोजगारी उपलब्ध गराउने विषयमा छलफल सुरु गरिएको मुख्यमन्त्री थापामगरले जानकारी दिए।
त्यस्तै, बाढी प्रभावित क्षेत्रका बालबालिकालाई कक्षा १२ सम्म निःशुल्क शिक्षा उपलब्ध गराउने तथा उनीहरूको आवासको जिम्मेवारीसमेत प्रदेश सरकारले लिने निर्णय गरेको उनले बताए। त्यसका लागि आवश्यक प्रक्रिया अघि बढाइएको उनको दाबी छ।
प्रदेश सरकारको यो योजनाले बाढीबाट विस्थापित परिवारलाई तत्काल राहतभन्दा माथि उठेर सुरक्षित आवास, शिक्षा र रोजगारीसहित दीर्घकालीन पुनर्स्थापनाको आधार तयार गर्ने अपेक्षा गरिएको छ।
