काठमाडौं । ९९औँ एकेडेमी अवार्ड (अस्कर)को अन्तर्राष्ट्रिय फिचर चलचित्र विधामा प्रतिस्पर्धाका लागि नेपालबाट ‘तिनीहरू : एलिफेन्ट्स इन द फग’ छनोट भएको छ।
द एकेडेमी अफ मोशन पिक्चर आर्ट्स एन्ड साइन्सेसअन्तर्गतको अन्तर्राष्ट्रिय फिचर चलचित्र छनोट समिति (नेपाल)ले यस चलचित्रलाई अस्करमा नेपालको प्रतिनिधित्वका लागि सिफारिस गरेको हो।
यस वर्ष अस्करमा प्रतिस्पर्धाका लागि नेपालबाट दुई नेपाली कथानक चलचित्रले आवेदन दिएका थिए। ‘तिनीहरू : एलिफेन्ट्स इन द फग’ र ‘गौँथली’ मध्ये प्राविधिक पक्ष, कथाको प्रस्तुति, चरित्रको भावनात्मक विश्लेषण तथा कलात्मक शिल्पलगायतका आधारमा ‘तिनीहरू’ छनोट भएको समितिले जनाएको छ।
समितिले गहन मूल्यांकनपछि एकेडेमीका मापदण्डअनुसार उच्चस्तरीय तथा उत्कृष्ट चलचित्रका रूपमा ‘तिनीहरू : एलिफेन्ट्स इन द फग’लाई नेपालको तर्फबाट प्रतियोगीका रूपमा सिफारिस गरिएको स्पष्ट पारेको छ।
कान्समा जुरी अवार्ड जितिसकेको चलचित्र
अविनास विक्रम शाह निर्देशित यो चलचित्रले यसअघि कान्स फिल्म फेस्टिभलमा जुरी अवार्ड जितेर अन्तर्राष्ट्रिय स्तरमा नेपालको उपस्थिति बलियो बनाइसकेको छ। चलचित्र गत शुक्रबारदेखि नेपालका हलमा प्रदर्शनरत छ।
जंगली हात्तीको आतंकबाट प्रभावित बस्तीमा बसोबास गर्ने अल्पसंख्यक समुदायको जीवन, संघर्ष र संवेदनालाई कथाको केन्द्रमा राखिएको चलचित्रमा पुष्पा थिङ लामा, दीपिका यादव, जस्मिन विश्वकर्मा, एलिज घिमिरे, महिमा नवबाग, गौरी मल्ल, माओत्से गुरुङ र आकांक्षा कार्कीलगायत कलाकारको अभिनय रहेको छ।
चलचित्रको पटकथा निर्देशक शाहकै रहेको छ भने कथा अविनाश विक्रम शाह र सन्दीप बादलको हो। नेपालसहित फ्रान्स, जर्मनी, ब्राजिल र नर्वेका निर्माण संस्थाको सहकार्यमा चलचित्र निर्माण गरिएको हो।
चलचित्रका निर्मातामा नेपालबाट अनुप पौडेल, फ्रान्सबाट जस्टिन पेचबर्टी र डेमियन मेघेर्बी तथा जर्मनीबाट माइकल हेनरिक्स रहेका छन्। सह–निर्मातामा नेपाल तथा ब्राजिलसहित विभिन्न देशका निर्माताहरू सहभागी छन्।
चार्ल्स अडिनेट लाइन प्रोड्युसर रहेको चलचित्रमा केकी अधिकारी, प्रतीक सुवेदी र प्रतिभा जोशी एशोसिएट निर्माता छन्। अन्डरग्राउन्ड टकिज नेपालको तर्फबाट प्रवेश गुरुङ सह–निर्माता तथा आदित्य बस्नेत, अनुज पौड्याल, सन्तोष भट्टराई र बेन्जामिन ग्रुब्स एशोसिएट निर्माता रहेका छन्।
