काठमाडौं । राष्ट्रपति रामचन्द्र पौडेलले राजनीतिक परिवर्तनको वास्तविक उपलब्धि नागरिकको दैनिक जीवनमा अनुभूत हुनुपर्ने बताएका छन्। उनले संविधानले सुनिश्चित गरेका अधिकार र राजनीतिक परिवर्तनलाई व्यवहारमा उतार्न सुशासन, उत्कृष्ट सेवा प्रवाह र परिणाममुखी शासन प्रणाली आवश्यक रहेकोमा जोड दिएका छन्।
संविधान दिवसका अवसरमा शीतलनिवासमा आयोजित समारोहलाई सम्बोधन गर्दै राष्ट्रपति पौडेलले नागरिकमा आशा जगाउन नसक्ने राज्य र व्यवस्था सफल हुन नसक्ने बताए। राजनीतिक परिवर्तनलाई नागरिकको जीवनसँग जोड्न शासन प्रणालीले नागरिकलाई प्रत्यक्ष लाभ र अनुभूति दिनुपर्ने उनको भनाइ थियो।
उनले शासकीय संरचनामा परिवर्तन हुँदैमा मात्रै युगका अपेक्षा पूरा नहुने स्पष्ट पारे। राज्यसत्ताको चरित्र, राजनीतिक निष्ठा र मूल्यमान्यतामा समेत परिवर्तन आवश्यक रहेको उल्लेख गर्दै उनले व्यवहारबाटै राजनीतिक परिवर्तनको औचित्य पुष्टि गर्नुपर्ने बताए।
राष्ट्रपति पौडेलले राजनीतिक दल, नेतृत्व, सरकार र सम्पूर्ण राज्यसत्तालाई अझ लोकतान्त्रिक, न्यायपूर्ण र परिणाममुखी बनाउने दायित्व रहेको बताए। उनका अनुसार संविधान दिवस केवल संविधान जारी भएको दिनको स्मरण गर्ने अवसर मात्र नभई राज्य सञ्चालनका उपलब्धि र कमजोरीबारे आत्मसमीक्षा गर्ने दिन पनि हो।
विपद्को पीडाबीच संविधान दिवस मनाइरहेको प्रसंग उल्लेख गर्दै उनले पुनर्निर्माणको प्राथमिकता भौतिक संरचना निर्माणमा मात्र सीमित हुन नहुने बताए। सडक, पुल र भवनसँगै विस्थापित परिवारको जीवन, जीविका र भविष्य सुरक्षित गर्ने कामलाई पनि पुनर्निर्माणको महत्वपूर्ण हिस्सा बनाउनुपर्ने उनको धारणा थियो।
राष्ट्रपति पौडेलले संविधानमा अन्तर्निहित लोकतान्त्रिक राज्यप्रणाली जनताको सर्वोपरि हितमा केन्द्रित हुने बताए। एकात्मक र केन्द्रीकृत शासन प्रणालीको विकल्पका रूपमा प्राप्त संघीयता संविधानको महत्वपूर्ण उपलब्धि भएको उल्लेख गर्दै उनले संघीय संरचनालाई नागरिकको जीवनमा प्रभावकारी सेवा र अधिकार सुनिश्चित गर्ने माध्यम बनाउनुपर्ने बताए।
उनले संविधानलाई केवल कागजमा लेखिएका शब्दको संग्रहका रूपमा बुझ्न नहुने बताए। संविधान नागरिकका सपना, आशा, अपेक्षा र अधिकारको साझा प्रतिज्ञा भएको उल्लेख गर्दै सरकार नागरिकको सेवक र न्याय राज्यको मूल ध्येय बन्नुपर्नेमा उनले जोड दिए।
राष्ट्रपति पौडेलले संविधान दिवसका अवसरमा संविधानका प्रावधानलाई भाषण र औपचारिकतामा सीमित नराखी नागरिकको जीवनमा प्रत्यक्ष अनुभूति हुने गरी कार्यान्वयन गर्ने संकल्प गर्न सबै पक्षलाई आह्वान गरेका छन्।
