काठमाडौँ । नेकपा एमालेको निर्वाचन समीक्षा तथा पार्टी पुनर्गठन कार्यदलले नेतृत्व पुनर्गठनको विषयमा देखिएको मतभेदलाई तत्काल निष्कर्षमा नपुर्याई तीन छुट्टाछुट्टै प्रतिवेदनलाई एकीकृत गरी साझा दस्तावेज तयार गर्ने निर्णय गरेको छ।
कार्यदलभित्र नेताहरू रामबहादुर थापा, शङ्कर पोखरेल र प्रदीप ज्ञवालीले निर्वाचन समीक्षा तथा पार्टी पुनर्गठनका विषयमा अलग–अलग प्रतिवेदनको मस्यौदा तयार गरेका थिए। निर्वाचन परिणामलाई आधार बनाएर वर्तमान शीर्ष नेतृत्वले नेतृत्वबाट मार्ग प्रशस्त गर्नुपर्ने वा नपर्ने विषय कार्यदलमा छलफलको मुख्य विषय बनेको थियो।
आइतबार बसेको कार्यदल बैठकले तीनै मस्यौदालाई आधार बनाएर आवश्यक परिमार्जनसहित एउटै साझा प्रतिवेदन तयार गरी पार्टी सचिवालयमा पठाउने निर्णय गरेको हो। कार्यदलले नेतृत्व पुनर्गठनका विवादित विषयमा प्रत्यक्ष निर्णय नगरी त्यसको टुंगो लगाउने जिम्मेवारी पार्टी सचिवालयलाई दिने भएको छ।
कार्यदलको निर्णयसँगै एमालेभित्र नेतृत्व पुनर्गठनबारे देखिएको मतभेदलाई तत्काल विवादका रूपमा अघि नबढाई साझा दस्तावेजमार्फत पार्टीको आगामी छलफलका लागि आधार तयार गर्ने प्रयास भएको छ।
यसैबीच, कार्यदलको सहमतिपछि एमालेको केन्द्रीय सचिवालय बैठक आज दिउँसो ३ बजेपछि बस्दैछ। सचिवालय बैठकले भोलिदेखि सुरु हुने केन्द्रीय कमिटी बैठकका एजेन्डा तथा निर्वाचन समीक्षा र पार्टी पुनर्गठनसम्बन्धी विषयलाई छलफलको प्रक्रियामा लैजाने तयारी गर्नेछ।
यता, एमाले सचिव महेश बस्नेतले कार्यदलको बैठकमा अध्यक्ष केपी शर्मा ओलीको राजीनामा माग नगर्ने विषयमा सहमति भएको दाबी गरेका छन्। यद्यपि, नेतृत्व पुनर्गठनको विषयमा अन्तिम निर्णय भने पार्टी सचिवालय र त्यसपछि केन्द्रीय कमिटीको छलफलबाट तय हुने देखिएको छ।
