ठमाडौं । नेकपा एमालेको सचिवालय बैठकले उपाध्यक्ष रामबहादुर थापा नेतृत्वको १५ सदस्यीय निर्वाचन समीक्षा तथा पार्टी पुनर्जागरण कार्यदलले तयार पारेको प्रतिवेदन सुझावसहित पारित गरेको छ।
पार्टी कार्यालय च्यासलमा सोमबार बिहान बसेको सचिवालय बैठकले सचिवालय सदस्यबाट प्राप्त सुझावसमेत समेटेर प्रतिवेदन पारित गरेको उपमहासचिव लेखराज भट्टले जानकारी दिए।
बैठकपछि भट्टले प्रतिवेदनमा पार्टी अध्यक्षको राजीनामा वा विशेष महाधिवेशन गर्ने विषय समावेश नरहेको स्पष्ट पारे। उनका अनुसार निर्वाचन समीक्षा तथा पार्टी पुनर्जागरणका विषयमा यसअघि तयार भएका तीनवटा छुट्टाछुट्टै प्रतिवेदनलाई समेटेर एकीकृत दस्तावेज तयार गरिएको हो।
निर्वाचन परिणामको समीक्षा, पार्टी संगठनको अवस्था र आगामी कार्यदिशाबारे कार्यदलले तयार पारेको प्रतिवेदन अब केन्द्रीय कमिटी बैठकमा छलफलका लागि प्रस्तुत गरिनेछ।
सचिवालय बैठक सकिएलगत्तै एमाले केन्द्रीय कमिटी बैठक बस्दैछ। केन्द्रीय कमिटी बैठकमा प्रतिवेदनमाथि छलफलसँगै निर्वाचनपछिको पार्टीको संगठनात्मक अवस्था र आगामी रणनीतिबारे थप निर्णय हुने अपेक्षा गरिएको छ।
