काठमाडौँ । प्रधानमन्त्री बालेन्द्र शाह र नेपाली सेनाका प्रधानसेनापति अशोकराज सिग्देलबीच सिंहदरबारमा भेटवार्ता भएको छ। प्रधानमन्त्री शाहले रक्षा मन्त्रालयसमेत सम्हालिरहेकाले भेटलाई नियमित प्रशासनिक संवादका रूपमा लिइएको नेपाली सेनाले जनाएको छ।
भेटका क्रममा प्रधानसेनापति सिग्देलले भोटेकोशी बाढीपछि नेपाली सेनाले सञ्चालन गरिरहेको खोज तथा उद्धार अभियानको पछिल्लो अवस्थाबारे प्रधानमन्त्री शाहलाई जानकारी गराएका थिए। बाढी प्रभावित क्षेत्रमा जारी खोज, उद्धार तथा शव व्यवस्थापनलगायतका गतिविधिबारे समेत उनले प्रधानमन्त्रीलाई अवगत गराएको जनाइएको छ।
त्यसैगरी, प्रधानसेनापति सिग्देलले गत भदौ ३१ देखि असोज ३ गतेसम्म गरेको चीन भ्रमणका क्रममा भएका भेटवार्ता तथा छलफलका विषयमा पनि प्रधानमन्त्री शाहलाई जानकारी गराएका थिए।
संयुक्त राष्ट्रसङ्घको ८१औँ महासभामा सहभागी हुन प्रधानमन्त्री शाह मंगलबार संयुक्त राज्य अमेरिका प्रस्थान गर्ने तयारीमा छन्। त्यसअघि भएको प्रधानमन्त्री र प्रधानसेनापतिबीचको भेटमा विपद्पछिको खोज तथा उद्धार अभियान, सुरक्षा निकायको भूमिका तथा प्रधानसेनापतिको चीन भ्रमणलगायत विषयमा समसामयिक छलफल भएको सेनाले जनाएको छ।
