काठमाडौँ । त्रिपुरेश्वरमा सोमबार रिद्धिसिद्धि यातायातको बसमा भएको आगलागीमा मृत्यु भएका व्यक्तिको पहिचानलाई लिएर अन्योल देखिएको छ। मृतकको साथबाट भेटिएको सवारी चालक अनुमतिपत्र (लाइसेन्स) का आधारमा प्रहरीले प्रारम्भमा उनी काभ्रेका २५ वर्षीय दावा लामा भएको जनाएको थियो। तर, दावा लामा नामका व्यक्ति नै सकुशल रहेको खुलेपछि मृतकको वास्तविक पहिचान यकिन हुन सकेको छैन।
प्रहरीले अब मृतकको पहिचानसँगै घटनास्थलमा भेटिएको लाइसेन्सको विवरण र त्यसको सम्भावित दुरुपयोगबारे समेत अनुसन्धान अघि बढाएको छ। आफूलाई दावा लामा बताउने व्यक्तिलाई प्रहरीले उपत्यका ट्राफिक प्रहरी कार्यालय, रामशाहपथमा बोलाएर सोधपुछ गरिरहेको एक प्रहरी अधिकृतले जानकारी दिएका छन्।
सोमबार दिउँसो त्रिपुरेश्वर बस स्टप नजिक बा ५ ख ४२७४ नम्बरको रिद्धिसिद्धि यातायातको बसमा अचानक आगलागी भएको थियो। आगलागीमा एक जनाको मृत्यु भएको थियो भने घटनापछि मृतकको पहिचान र आगलागीको कारणबारे प्रहरीले अनुसन्धान गरिरहेको छ।
प्रारम्भिक विवरणअनुसार आगलागी हुनुअघि बसका चालक र ट्राफिक प्रहरीबीच विवाद भएको थियो। विवाद भएको केही समयपछि बसको पछिल्लो भागबाट आगो सल्किएको देखिएको बताइएको छ।
घटनामा मृतकको पहिचानका लागि प्रहरीले लाइसेन्सबाहेक अन्य प्रमाण र विवरणसमेत जाँच गरिरहेको छ। साथै, बसमा आगलागी कसरी सुरु भयो, चालक र ट्राफिक प्रहरीबीच भएको विवादको प्रकृति के थियो तथा आगलागीमा कुनै आपराधिक संलग्नता वा अन्य कारण जोडिएको छ कि छैन भन्ने विषयमा समेत अनुसन्धान केन्द्रित गरिएको प्रहरीले जनाएको छ।
