हुम्ला । कर्णाली करिडोरअन्तर्गत सर्केगाड गाउँपालिका–२ रिप नजिकैको छारेभिरमा पहिरोसँगै खसेका ठूला ढुङ्गा हटाउन समस्या भएपछि सडक सञ्चालनमा ढिलाइ हुने भएको छ । दुई स्थानबाट पहिरो खसेपछि करिब एक सय मिटर सडकखण्ड ठूला ढुङ्गाले पुरिएको छ ।
पहिरो खस्ने क्रम अझै नरोकिएको र सडकमा थुप्रिएका ढुङ्गा सामान्य स्काभेटरबाट हटाउन सम्भव नभएपछि ड्रिल मेसिन प्रयोग गरी ब्लास्टिङमार्फत ढुङ्गा फुटाउने तयारी गरिएको हिल्सा–सिमकोट सडक आयोजनाका प्रमुख बेलबहादुर नेपालीले जानकारी दिए ।
उनका अनुसार ब्लास्टिङका लागि आवश्यक प्राविधिक तथा अन्य तयारी भइरहेको छ । मौसम र प्राविधिक अवस्था अनुकूल भए सडक छिट्टै खुलाउने प्रयास भइरहेको भए पनि अवस्था प्रतिकूल बनेमा सडक सञ्चालनमा ल्याउन थप एक साता लाग्न सक्ने देखिएको छ । त्यसका लागि आवश्यक बजेट व्यवस्थापनको कामसमेत भइरहेको आयोजनाले जनाएको छ ।
डोरी र भर्याङको सहारामा जोखिमपूर्ण यात्रा
सडक अवरुद्ध भएपछि यात्रुहरू वैकल्पिक बाटोको नाममा जोखिमपूर्ण भिरको बाटो प्रयोग गर्न बाध्य भएका छन् । स्थानीयले सडकको भिरतर्फ डोरी बाँधेर भर्याङ निर्माण गरी आवतजावत गराइरहेका छन् ।
स्थानीय कमल बुढाका अनुसार सडकमार्गबाट नियमित आवतजावत सम्भव नभएपछि यात्रुहरूले ज्यान जोखिममा राखेर भिर छिचोल्दै यात्रा गर्नुपरेको छ ।
ज्ञानोदय माध्यमिक विद्यालयका शिक्षक रिमिलाल बुढाले पनि निकै कठिन यात्रा गरेर सदरमुकाम सिमकोट पुगेको बताए । विभिन्न सरोकारवाला निकायसँग सम्पर्क गर्दा तत्काल समाधान ननिस्किएपछि अन्तिम विकल्पका रूपमा भर्याङ र डोरीको सहारा लिएर भिर पार गर्नुपरेको उनको भनाइ छ ।
यात्रु तथा मानसरोवर जाने तीर्थयात्री प्रभावित
सडक अवरुद्ध भएपछि कर्णाली करिडोर हुँदै हुम्ला आवतजावत गर्ने यात्रु तथा सवारीसाधन प्रभावित भएका छन् । सुर्खेत–नेपालगञ्जबाट सिमकोट तथा सिमकोटबाट नेपालगञ्ज हुँदै कैलाश मानसरोवर दर्शनका लागि जाने यात्रुहरू समेत बाटोमै अलपत्र परेका छन् ।
शुक्रबार दिउँसोदेखि सडक अवरुद्ध भएपछि करिडोरमा यातायात सेवा प्रभावित भएको हो । सडक खुल्न नसक्दा दैनिक आवतजावतसँगै स्थानीयको आवागमन र तीर्थयात्रीको यात्रा थप कठिन बनेको छ ।
आयोजना प्रमुख नेपालीले सडक खुलाउन प्राविधिक टोली तथा आवश्यक उपकरण परिचालन गरिएको जानकारी दिँदै पहिरोस्थल अत्यन्त जोखिमपूर्ण रहेकाले यात्रुहरूलाई भिरबाट वैकल्पिक रूपमा आवतजावत नगर्न आग्रह गरेका छन् ।
पहिरो खस्ने क्रम जारी रहेकाले थप जोखिम हुनसक्ने भन्दै आयोजना कार्यालयले सुरक्षित रूपमा सडक सञ्चालनमा ल्याउन आवश्यक प्राविधिक प्रक्रिया अघि बढाएको जनाएको छ ।
