काठमाण्डौँ । राष्ट्रपति रामचन्द्र पौडेल आज संघीय संसदका दुवै सदनको संयुक्त बैठकमा सम्बोधनका लागि जाँदैछन्। सम्बोधनका लागि जाँदा र फर्किँदा सर्वसाधारणको आवागमनमा रोक नलगाइने भएको छ।
राष्ट्रपति पौडेलले शुक्रबार अपरान्ह ४ बजे संसद्का दुवै सदनको संयुक्त बैठकलाई सम्बोधन गर्ने कार्यक्रम छ। संघीय संसद् भवनमा बस्ने दुवै सदनको बैठक सम्बोधन र नीति तथा कार्यक्रम प्रस्तुतका लागि शीतलनिवासबाट नयाँ बानेश्वर जाँदा रफर्किँदा सर्वसाधारणको सडक आवतजावतमा रोक नलगाइने भएको ट्राफिक प्रहरी कार्यालयका प्रवक्ता एसएसपी राजेन्द्रप्रसाद भट्टले बताएका छन्।
राष्ट्रपति जाँदा र फर्किँदा सडक आवातजावतमा रोक लगाउने कुनै व्यवस्था छैन।’ उनी भन्छन्, ‘राष्ट्रपति ज्यू यसअघि जस्तै सामान्य रूपमा कुनैपनि सर्वसाधारणलाई सडक आवातजावतमा रोक नलगाइ जाने र फर्किँनुहुनेछ।’
नीति तथा कार्यक्रम प्रस्तुत गर्न आज संसदमा सम्बोधन गर्न जान लागेका राष्ट्रपति पौडेलले त्यहाँ आफ्नो लागि कुनै तामझाम नगर्न निर्देशन दिएका छन्। सचिवालयका अनुसार नागरिकलाई सास्ती हुने भएकाले आफू संसद भवन जाँदा कुनै तामझामको व्यवस्था नगर्न राष्ट्रपतिले निर्देशन दिएका हुन्। यसअघिका राष्ट्रपतिहरूले सडक अवरुद्ध गरेर आवतजावात गर्ने गरेकै कारण सर्वसाधारणले सास्ती भोग्दै आएको भन्दै पौडेलले आफूले यसो नगर्ने बताउँदै आएका छन्।
