बुटवल । नेपाली कांग्रेसका केन्द्रीय सदस्य एवं पूर्वगृहमन्त्री बालकृष्ण खाँणले आगामी १५औँ महाधिवेशनबाट गगनकुमार थापा पार्टी सभापति बन्ने दाबी गरेका छन्।
कांग्रेस बुटवल उपमहानगरपालिका समितिको अधिवेशन उद्घाटन गर्दै नेता खाँणले पार्टीभित्र नेतृत्व चयनलाई लिएर विगतमा जस्तो तीव्र विवाद र वैचारिक मतभेद नरहेको बताए। उनले यसपटकको महाधिवेशनलाई एकता, पुस्तान्तरण र पार्टी रूपान्तरणको महाधिवेशन बनाउनुपर्ने धारणा राखे।
खाँणले कांग्रेसका नेता तथा कार्यकर्तालाई सभापतिको विषयमा कुनै अन्योलमा नपर्न आग्रह गर्दै गगन थापाको नेतृत्वमा पार्टीलाई अघि बढाउने वातावरण निर्माण भइरहेको बताए।
उनका अनुसार देशभर सम्पन्न वडा तहका अधिवेशनमा करिब ९० प्रतिशतसम्म सहमति कायम भएको छ।
विगतका महाधिवेशनमा नेतृत्व, पार्टीको सिद्धान्त र राजनीतिक दिशालाई लिएर गम्भीर मतभेद देखिए पनि अहिले त्यस्तो अवस्था नरहेको उनको भनाइ थियो।
नेता खाँणले कांग्रेसको नेतृत्व अब नयाँ पुस्ताको काँधमा पुग्दै गएको उल्लेख गर्दै गगन थापाको नेतृत्वमा युवा पुस्ता, संगठनात्मक ऊर्जा र रूपान्तरणको एजेन्डालाई अघि बढाउनुपर्ने बताए।
उनले पार्टीलाई थप एकताबद्ध र सुदृढ बनाउन स्थानीय तहदेखि नै सहमति, सहकार्य र आपसी विश्वासको वातावरण निर्माण गर्नुपर्नेमा जोड दिए।
समसामयिक राजनीतिक अवस्थाको चर्चा गर्दै खाँणले संविधान र लोकतान्त्रिक मूल्य–मान्यताको संरक्षणका लागि कांग्रेस अझ बलियो र एकताबद्ध हुनुपर्ने बताए। उनले संविधान कमजोर पार्ने कुनै पनि प्रयासको प्रतिरोध गर्दै लोकतान्त्रिक व्यवस्थाको संरक्षण गर्ने जिम्मेवारी कांग्रेसका नेता-कार्यकर्ताको भएको धारणा राखे।
नेता खाँणले कांग्रेसको संगठन सुदृढीकरण, पुस्तान्तरण र आन्तरिक एकताका लागि सबै पक्षलाई महाधिवेशनमा सकारात्मक भूमिका निर्वाह गर्न आग्रह गरे।
गगन थापाको नेतृत्वमा कांग्रेसलाई नयाँ ऊर्जा, स्पष्ट राजनीतिक दिशा र सुदृढ संगठनसहित अघि बढाउने वातावरण निर्माण गर्नुपर्नेमा उनको जोड थियो।
