काठमाडौँ । सरकारद्वारा विभिन्न १३ मुलुकका लागि सिफारिस गरिएका प्रस्तावित राजदूतहरूको संसदीय सुनुवाइ प्रक्रिया औपचारिक रूपमा अघि बढेको छ।
सिंहदरबारमा बिहीबार बसेको संघीय संसद अन्तर्गतको संसदीय सुनुवाइ समितिको बैठकले प्रस्तावित राजदूतहरूबारे सार्वजनिक सूचना जारी गर्दै १० दिने उजुरी आह्वान गर्ने निर्णय गरेको हो।
समितिका सभापति बोधनारायण श्रेष्ठका अनुसार सिफारिसमा परेका व्यक्तिहरूका सम्बन्धमा कुनै सूचना, गुनासो वा उजुरी भए आधार र प्रमाणसहित १० दिनभित्र समितिमा पेस गर्न सकिनेछ। सर्वसाधारणले विद्युतीय वा अन्य जुनसुकै माध्यमबाट आफ्ना उजुरी दर्ता गराउन सक्ने व्यवस्था मिलाइएको छ। प्रस्तावित व्यक्तिहरूबारे आम नागरिकलाई सुसूचित गराउन र प्रक्रियालाई पारदर्शी बनाउन सूचना प्रकाशित गरिएको सभापति श्रेष्ठले बताए।
गत शुक्रबार बसेको मन्त्रिपरिषद् बैठकले भारत, चीन, अमेरिकालगायत १३ देशका लागि राजदूत नियुक्ति गर्ने निर्णय गर्दै नामावली सिफारिस गरेको थियो। संवैधानिक व्यवस्थाअनुसार मन्त्रिपरिषद्को सिफारिस समितिमा प्राप्त भएसँगै सुनुवाइको चरण आरम्भ भएको हो।
समितिले प्राप्त उजुरीहरूमाथि अध्ययन गरेपछि प्रस्तावित राजदूतहरूसँग प्रत्यक्ष सुनुवाइ गर्नेछ। सुनुवाइ सकिएपछि समितिले नियुक्तिका लागि नाम अनुमोदन गर्ने वा नगर्नेबारे अन्तिम निर्णय लिनेछ।
