काठमाडौं । मोडल तथा अभिनेत्री रुषा न्यौपाने नेपाली कस्मेटिक ब्रान्ड ‘नव लक्स’को ब्रान्ड एम्बेसडरमा नियुक्त भएकी छन्। नव लक्स र रुषाबीच ब्रान्ड प्रवर्द्धनसम्बन्धी औपचारिक कागजी सम्झौतासमेत सम्पन्न भएको छ।
नेपालमै उत्पादन हुँदै आएको नव लक्सले जनवरी २०२६ देखि बजारमा आफ्ना कस्मेटिक उत्पादन उपलब्ध गराउँदै आएको जनाएको छ। कम्पनीका अनुसार हाल ब्रान्डअन्तर्गत फेसवास, मोइस्चराइजर, टोनर, एसपीएफ ५० सनस्क्रिन क्रिम, भिटामिन ‘सी’ सिरम र फुट क्रिम गरी ६ प्रकारका उत्पादन रहेका छन्।
चलचित्र तथा म्युजिक भिडियोमा आफ्नो अभिनयमार्फत पहिचान बनाएकी रुषा पछिल्लो समय चलचित्र क्षेत्रमा पनि सक्रिय छिन्। उनी हाल छायांकन भइरहेको चलचित्र ‘म मदनकृष्ण’मा अभिनेत्रीका रूपमा काम गरिरहेकी छन्। यसअघि उनले ‘जन्ते बाख्रो’लगायतका फिचर फिल्ममा अभिनय गरिसकेकी छन्। साथै, उनले दर्जनौँ म्युजिक भिडियोमा समेत अभिनय गरेकी छन्।
ब्रान्ड एम्बेसडर बनेपछि रुषाले आफूले प्रयोग गर्दै आएको कस्मेटिक ब्रान्डसँग जोडिन पाउँदा खुसी लागेको बताइन्। उनका अनुसार आफूले प्रयोग र विश्वास गर्दै आएको उत्पादनको प्रवर्द्धनमा प्रत्यक्ष रूपमा जोडिन पाउनु गौरवको विषय हो।
“म यो ब्रान्डसँग जोडिन पाउँदा आफैँमा खुसी छु। आफैँले प्रयोग गर्दै आएको कस्मेटिकको ब्रान्डसँग जोडिन पाउनु मेरा लागि गौरवको कुरा हो,” रुषाले भनिन्, “म यो ब्रान्डलाई माथि उठाउन र जनस्तरसम्म पुर्याउन मैले सकेको सबै प्रयास गर्नेछु।”
रुषाको लोकप्रियता र नव लक्सको नेपाली बजारमा विस्तारलाई जोडेर ब्रान्डले आफ्नो पहुँच थप फराकिलो बनाउने अपेक्षा गरेको छ।
