गुल्मी । अविरल वर्षासँगै आएको बाढीपहिरोले गुल्मीका विभिन्न स्थानीय तहमा जनजीवन प्रभावित बनेको छ। जिल्लामा २३१ घर उच्च जोखिममा परेका छन् भने जोखिममा रहेका केही परिवार आफन्त तथा छिमेकीको घरमा आश्रय लिएर बस्न बाध्य भएका छन्।
जिल्ला प्रहरी कार्यालय गुल्मीका अनुसार कालीगण्डकी गाउँपालिकाका १५, सत्यवतीका ३०, रुरुक्षेत्रका ४०, मुसिकोट नगरपालिकाका १२ र रेसुङ्गा नगरपालिकाका २५ घर बाढीपहिरोको जोखिममा छन्।
त्यस्तै, गुल्मीदरबार गाउँपालिकाका पाँच, चन्द्रकोटका ७०, धुर्कोटका १५, इस्माका १२ र छत्रकोटका सात घर उच्च जोखिममा रहेको जिल्ला प्रहरी कार्यालयले जनाएको छ।
जिल्ला प्रहरी प्रमुख एवं प्रहरी उपरीक्षक भीमकिरण बोगटीका अनुसार बाढीपहिरोबाट भएको क्षतिको विवरण संकलन गर्ने काम जारी छ। विभिन्न स्थानबाट थप विवरण आउने क्रम रहेकाले जोखिममा परेका तथा विस्थापित परिवारको संख्या बढ्न सक्ने उनले बताए।
बाढीपहिरोका कारण घर जोखिममा परेका तथा विस्थापित परिवारलाई स्थानीय तहको समन्वयमा सुरक्षित स्थानमा सार्ने काम भइरहेको प्रहरीले जनाएको छ। सम्भावित जोखिमलाई मध्यनजर गर्दै प्रभावित क्षेत्रमा सुरक्षा निकायले निगरानी तथा आवश्यक उद्धारका लागि तयारीसमेत बढाएको छ।
लगातार वर्षा भइरहेकाले जिल्लाका पहाडी तथा भिरालो क्षेत्रमा थप पहिरो जान सक्ने जोखिम रहेको भन्दै स्थानीयवासीलाई सतर्क रहन र जोखिमयुक्त स्थानमा नबस्न आग्रह गरिएको छ।
