काठमाडौं । मौसम पूर्वानुमान महाशाखाका अनुसार सोमबार असोज १२ गते देशभर आंशिक बदली रहनेछ। हिमाली तथा पहाडी भू–भागका केही स्थानमा मेघगर्जन र चट्याङसहित मध्यम वर्षा हुने सम्भावना रहेको छ।
महाशाखाका अनुसार हिमाली क्षेत्रमा हल्का हिमपातको समेत सम्भावना रहेको छ। मौसममा आएको परिवर्तनसँगै पहाडी तथा हिमाली क्षेत्रमा यात्रा गर्दा आवश्यक सावधानी अपनाउन आग्रह गरिएको छ।
यस्तै, सुदूरपश्चिम प्रदेशको तराई भू–भागका थोरै स्थान तथा कोशी, मधेस, वाग्मती, गण्डकी र लुम्बिनी प्रदेशका तराई भू–भागका एक–दुई स्थानमा मेघगर्जन र चट्याङसहित मध्यमसम्म वर्षा हुन सक्ने पूर्वानुमान गरिएको छ।
देशका केही स्थानमा वर्षा र चट्याङको सम्भावना रहेकाले मौसमको अवस्था हेरेर दैनिक गतिविधि सञ्चालन गर्न तथा जोखिमयुक्त क्षेत्रमा आवश्यक सतर्कता अपनाउन महाशाखाले सुझाव दिएको छ।
