बुटवल । पूर्वराष्ट्रपति विद्यादेवी भण्डारी रुपन्देही आइपुगेकी छन्। मदन भण्डारी स्पोर्ट्स एकेडेमीले बुटवलमा आयोजना गरेको अन्तर्राष्ट्रिय आमन्त्रित पुरुष भलिबल प्रतियोगिता उद्घाटन गर्न भण्डारी रुपन्देही आएकी हुन्।
मौसम प्रतिकूल भएपछि सोमबार हुने भनिएको प्रतियोगिताको उद्घाटन कार्यक्रम आजका लागि सारिएको हो। भण्डारी भने सोमबार राति नै रुपन्देही आइपुगेकी थिइन्।
एमाले रुपन्देहीका अध्यक्ष यज्ञ गैरेका अनुसार भण्डारीले आज दिउँसो १ बजे प्रतियोगिताको औपचारिक उद्घाटन गर्ने कार्यक्रम छ। त्यसअघि उनले एमाले रुपन्देहीको पार्टी कार्यालयमा पार्टीका नेता तथा कार्यकर्तासँग भेटघाट गर्नेछिन्।
प्रतियोगिताको उद्घाटनपछि भण्डारी आजै काठमाडौं फर्कने कार्यक्रम रहेको गैरेले जानकारी दिएका छन्।
मदन भण्डारी स्पोर्ट्स एकेडेमीको आयोजनामा बुटवलमा भइरहेको प्रतियोगितामा विभिन्न देशका पुरुष भलिबल टोलीको सहभागिता रहेको छ। प्रतियोगिताको उद्घाटनसँगै खेल गतिविधि औपचारिक रूपमा अघि बढ्नेछ।
