अर्घाखाँची । नेपाली कांग्रेसको १५औँ महाधिवेशनअन्तर्गत अर्घाखाँचीमा सम्पन्न प्रदेशसभा प्रतिनिधि तथा केन्द्रीय महाधिवेशन प्रतिनिधिको निर्वाचनपछि मतगणनाका लागि सर्वपक्षीय सहमति गरिएको छ।
मतगणनालाई व्यवस्थित, निष्पक्ष र पारदर्शी बनाउन उम्मेदवार तथा प्रतिनिधिहरूको सहमतिमा विभिन्न कार्यविधि तय गरिएको हो।
सहमतिअनुसार मतपत्र तथा मतपेटिकाको सिलबन्दी सुरक्षित रूपमा राखी निर्धारित स्थानमै मतगणना सुरु गरिनेछ। सहमतिका मुख्य बुँदाहरूमा मतगणना स्थलमा सम्बन्धित उम्मेदवार वा उहाँका तर्फबाट एक जना मात्र प्रतिनिधि/वारिस उपस्थित हुन पाउने, मतपत्र गणना तोकिएको स्थानमै गर्ने तथा अन्य स्थानमा लगिएका वा भेटिएका मतपत्र सम्बन्धित मतगणना स्थलमै ल्याएर गणना गर्ने व्यवस्था गरिएको छ।
त्यस्तै, मतपत्रमा मतदानको स्पष्टता नदेखिने वा निर्धारित मापदण्ड पूरा नगर्ने मतलाई अमान्य मानिने सहमति भएको छ। मतगणना स्थलभित्र अनधिकृत व्यक्ति प्रवेश गर्न तथा गणनाको क्रममा अवाञ्छित गतिविधि गर्न नपाइने व्यवस्था पनि गरिएको छ।
मतगणनाका क्रममा प्रत्येक ५०० मत गणना सम्पन्न भएपछि बाहिर आवश्यक जानकारी गराउने व्यवस्था मिलाइएको छ। मतगणना स्थलमा उम्मेदवार वा प्रतिनिधिले तोकिएको स्थान र नियम पालना गर्नुपर्ने तथा मोबाइललगायतका उपकरणको प्रयोगमा समेत आवश्यक नियन्त्रण गरिने सहमति भएको छ।
मतगणनाका क्रममा कुनै विषयमा द्विविधा वा विवाद उत्पन्न भएमा निर्वाचनसम्बन्धी नियम, निर्देशिका तथा स्वीकृत कार्यविधिअनुसार निर्णय गर्ने सहमति गरिएको छ।
निर्वाचन शान्तिपूर्ण रूपमा सम्पन्न भएसँगै अब सहमतिअनुसार मतगणना अघि बढाइने भएको छ। मतगणना प्रक्रियालाई व्यवस्थित, विश्वसनीय र पारदर्शी हुने कुरामा सबैलाई बिश्वस्त रहन आग्रह मुख्य निर्वाचन अधिकृत अन्जु रेग्मीले बताउनु भएको छ ।
