बागलुङ । निसीखोला गाउँपालिका–३ बोहरागाउँमा सडक स्तरोन्नतिका क्रममा माटोको ढिस्को खस्दा तीन जना कामदार पुरिएका छन्।
झिवाखोलाबाट बोहरागाउँ जाने भित्री सडकखण्डमा सोमबार बिहान सडक खन्ने क्रममा अचानक माटोको ढिस्को खसेर काम गरिरहेका तीन जना पुरिएको जिल्ला प्रहरी कार्यालय बागलुङका प्रहरी प्रमुख फडिन्द्र प्रसाईंले जानकारी दिए।
प्रहरीका अनुसार स्थानीय चालक भद्र मल्लले चलाएको लु१क ३४४६ नम्बरको जेसिबीले सडक स्तरोन्नतिको काम गरिरहेका बेला ढिस्को खसेको हो।
ढिस्कोमा पुरिनेमा लालबहादुर बुढाथोकी, राजु थापा मगर र कृष्णबहादुर घर्ती रहेका छन्। घर्तीलाई गम्भीर अवस्थामा उद्धार गरिएको छ भने अन्य दुई जनाको उद्धार कार्य जारी रहेको प्रहरीले जनाएको छ।
घटनापछि प्रहरी तथा स्थानीयको टोली उद्धारमा परिचालन भएको छ।
