काठमाडौँ । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमितिका लागि आज उम्मेदवारी दर्ता हुँदैछ। पार्टीको नयाँ नेतृत्व चयनका लागि देशभरबाट आएका ७ हजार ११४ महाधिवेशन प्रतिनिधि निर्वाचन प्रक्रियामा सहभागी हुँदैछन्।
निर्वाचन समितिले राष्ट्रिय सभागृहमा निर्वाचन कार्यालय स्थापना गरी बिहान १० बजेदेखि उम्मेदवारी मनोनयन फारम वितरण सुरु गरेको छ। निर्वाचन समितिका सदस्य–सचिव राजु कटवालका अनुसार उम्मेदवारहरूले निर्धारित प्रक्रिया पूरा गरी मनोनयन दर्ता गर्न सक्नेछन्।
महाधिवेशन प्रतिनिधिहरूको नामावली राष्ट्रिय सभागृहको भित्री पर्खालमा सार्वजनिक गरिएको छ। उम्मेदवारी दिन इच्छुक प्रतिनिधिले सभागृह परिसरमै प्रभु बैंकका कर्मचारीमार्फत निर्धारित शुल्क बुझाएर मनोनयन प्रक्रियामा सहभागी हुन सक्ने व्यवस्था गरिएको छ।
निर्वाचन समितिका अनुसार दिउँसो १२ः३० बजेदेखि अपराह्न ४ बजेसम्म उम्मेदवारी मनोनयन दर्ता हुनेछ। यससँगै कांग्रेसको नयाँ नेतृत्वका लागि सभापति, उपसभापति, महामन्त्री, सहमहामन्त्रीसहित केन्द्रीय सदस्य पदमा प्रतिस्पर्धा गर्ने नेताहरू औपचारिक रूपमा मैदानमा उत्रिनेछन्।
यसपटक कांग्रेसले केन्द्रीय कार्यसमितिको आकारमा उल्लेख्य वृद्धि गरेको छ। सोमबार पारित संशोधित विधानअनुसार १६७ सदस्यीय केन्द्रीय कार्यसमितिलाई बढाएर २९७ सदस्यीय बनाइएको छ। त्यस्तै पदाधिकारीको संख्या पनि १४ बाट बढाएर २६ पुर्याइएको छ।
नयाँ व्यवस्थाअनुसार एक वरिष्ठ उपसभापति र एक महिला उपसभापति थपिएका छन्। अब उपसभापतिको संख्या चार पुगेको छ। महामन्त्रीको संख्या तीन पुर्याउँदै एक महिला महामन्त्री अनिवार्य गरिएको छ।
त्यसैगरी दुई खुला सहमहामन्त्री थपिएपछि सहमहामन्त्रीको संख्या ११ पुगेको छ। कांग्रेसले संगठनभित्र प्रवक्ता पदसमेत थप गरेको छ भने आवश्यकताका आधारमा सहप्रवक्ताको संख्या बढाउन सकिने व्यवस्था गरिएको जनाएको छ।
यसअघि १४औँ महाधिवेशनबाट निर्वाचित कांग्रेसको केन्द्रीय कार्यसमिति १६७ सदस्यीय थियो भने पदाधिकारीको संख्या १४ थियो। यसपटक महाधिवेशन प्रतिनिधिको संख्या, समावेशी सहभागिता र संगठनको संरचनालाई ध्यानमा राख्दै केन्द्रीय कार्यसमितिको आकार तथा पदाधिकारीको संख्या बढाइएको कांग्रेसले जनाएको छ।
आजको उम्मेदवारी दर्तासँगै कांग्रेसको १५औँ महाधिवेशन नेतृत्व चयनको निर्णायक चरणमा प्रवेश गरेको छ। पार्टीभित्र विभिन्न समूह, पुस्ता र क्षेत्रबाट उम्मेदवारी घोषणा गर्ने क्रम तीव्र बनेकाले नयाँ नेतृत्वका लागि हुने प्रतिस्पर्धालाई कांग्रेसको भावी राजनीतिक दिशासँग जोडेर हेरिएको छ।
