काठमाडौँ । विभिन्न १३ देशका लागि सरकारले सिफारिस गरेका प्रस्तावित राजदूतहरूको संसदीय सुनुवाइ प्रक्रिया आजदेखि सुरु हुँदैछ। प्रस्तावित राजदूतहरूको नियुक्ति अघि संसदीय सुनुवाइ समितिले उनीहरूको योग्यता, कार्ययोजना र उनीहरूमाथि परेका उजुरीका आधारमा सुनुवाइ गर्ने भएको हो।
यसका लागि संसदीय सुनुवाइ समिति (संयुक्त) को बैठक आज बस्दैछ। बैठकमा प्रस्तावित राजदूतविरुद्ध परेका उजुरी खोलिने तथा समितिका सदस्यहरूलाई अध्ययनका लागि वितरण गरिनेछ।
समितिका अनुसार १३ प्रस्तावित राजदूतविरुद्ध ७ वटा उजुरी परेका छन्। तीमध्ये एउटा उजुरी गोप्य रहेको छ भने बाँकी उजुरी सबै प्रस्तावित राजदूतलाई समेटेर अर्थात् ‘कमन’ रूपमा परेको समितिले जनाएको छ।
उजुरीसँगै प्रस्तावित राजदूतहरूले समितिमा पेस गरेका कार्ययोजना पनि सदस्यहरूलाई वितरण गरिने भएको छ। समितिका सचिव तुलबहादुर कँडेलका अनुसार सुनुवाइअघि प्रस्तावित राजदूतहरूलाई सम्बन्धित मुलुकमा रहेर गर्ने काम र प्राथमिकतासहितको कार्ययोजना पेस गर्न भनिएको थियो। सोहीअनुसार समितिमा कार्ययोजना प्राप्त भइसकेको छ।
सरकारले विभिन्न १३ देशका लागि राजदूत सिफारिस गरेको थियो। जसअनुसार भारतका लागि डा. निश्चलनाथ पाण्डे, चीनका लागि डा. कल्याणराज शर्मा, अमेरिकाका लागि चिरनजंग थापा र बेलायतका लागि पूर्वप्रधानसेनापति गौरवशम्शेर जबरालाई सिफारिस गरिएको छ।
त्यस्तै जापानका लागि जिज्ञानकुमार थापा, इजरायलका लागि सुरेशकुमार कर्ण, स्पेनका लागि प्राप्ति शेरचन, जर्मनीका लागि शरू जोशी, ओमानका लागि डा. पद्माक्षी राणा, मलेसियाका लागि चूडामणि खरेल, दक्षिण कोरियाका लागि प्रा. डा. सङ्गम श्रेष्ठ, श्रीलंकाका लागि डा. मञ्चला झा र साउदी अरेबियाका लागि गिरीबहादुर सुनार सिफारिस भएका छन्।
अब संसदीय सुनुवाइ समितिले प्रस्तावित राजदूतहरूको कार्ययोजना, योग्यता, अनुभव तथा उनीहरूमाथि परेका उजुरी अध्ययन गरी सुनुवाइ प्रक्रिया अघि बढाउनेछ। १३ देशका लागि प्रस्तावित राजदूतको सुनुवाइ प्रक्रिया सुरु भएसँगै उनीहरूको नियुक्तिको संवैधानिक प्रक्रिया पनि निर्णायक चरणमा प्रवेश गरेको छ।
