काठमाडौं । बजारमा खाना पकाउने एलपी ग्यासको अभाव चुलिँदै गएपछि ग्यास बिक्रेता महासंघ नेपालले तत्काल आपूर्ति व्यवस्थापन सुधार गर्न नेपाल आयल निगमको ध्यानाकर्षण गराएको छ।
महासंघले निगमका कार्यकारी निर्देशक नागेन्द्र साहलाई ज्ञापनपत्र बुझाउँदै ग्यास उद्योगहरूले गर्दै आएको खुद्रा सिलिन्डर बिक्री तत्काल रोक्न र डिलरमार्फत मात्रै ग्यास बिक्री–वितरणको व्यवस्था मिलाउन माग गरेको हो।
महासंघका अध्यक्ष ज्ञानेश्वर अर्यालले बजारमा आवश्यकताभन्दा बढी सिलिन्डर रहेको र यही कारण ग्यासको वास्तविक आपूर्ति व्यवस्थापनमा समस्या देखिएको दाबी गरेका छन्। उनका अनुसार बजारमा सिलिन्डरको संख्या नियन्त्रण र वितरण प्रणाली व्यवस्थित नगरेसम्म ग्यास अभावको समस्या समाधान हुन कठिन छ।
महासंघले ग्यासको अभाव भइरहेका बेला केही उद्योगहरूले रु. २ हजार ५ सयदेखि २ हजार ७ सयसम्ममा नयाँ सिलिन्डर बिक्री गरिरहेको भन्दै आपत्ति जनाएको छ। बजारमा पहिले नै पर्याप्त सिलिन्डर रहेको अवस्थामा नयाँ सिलिन्डर बिक्री बढाउनु उपभोक्तामाथि थप आर्थिक भार पार्ने काम भएको महासंघको भनाइ छ।
महासंघले बजारमा रहेका अनावश्यक सिलिन्डरको धरौटी रकम फिर्ता गरी व्यवस्थापन गर्नुपर्नेमा उल्टै विभिन्न क्षमताका नयाँ सिलिन्डर बजारमा ल्याउने योजना अघि सारिएको भन्दै त्यसको विरोध गरेको छ।
विशेषगरी ५ किलो, १९ किलो, ५० किलो र ४५० किलो क्षमताका नयाँ सिलिन्डर बिक्री गर्ने योजना उपभोक्ताको हितविपरीत रहेको महासंघको दाबी छ। बजारमा रहेका सिलिन्डरको उचित व्यवस्थापन नगरी नयाँ सिलिन्डर थप्दै जाने हो भने आगामी दिनमा उपभोक्तामाथि थप आर्थिक भार पर्ने चेतावनी महासंघले दिएको छ।
ग्यास आपूर्तिको व्यवस्थापनमा उद्योग र डिलरबीचको भूमिकालाई स्पष्ट पार्दै डिलर प्रणालीमार्फत पारदर्शी र व्यवस्थित वितरण गर्नुपर्ने महासंघको माग छ। पछिल्लो समय ग्यास अभावका कारण उपभोक्ताले खेपिरहेको समस्या तत्काल सम्बोधन गर्न निगमले प्रभावकारी कदम चाल्नुपर्ने महासंघले जनाएको छ।
