काठमाडौँ । मेडिकल व्यवसायी दुर्गा प्रसाईंलाई विद्युतीय कारोबारसम्बन्धी कसुरमा जिल्ला अदालत काठमाडौँले २ लाख रुपैयाँ धरौटीमा रिहा गर्न आदेश दिएको छ।
जिल्ला न्यायाधीश उमेशप्रसाद लुइँटेलको इजलासले मंगलबार प्रसाईंलाई धरौटीमा रिहा गर्ने आदेश दिएको हो। अदालतको आदेशसँगै विद्युतीय अपराध ऐनअन्तर्गत उनीमाथि अघि बढाइएको मुद्दामा तत्कालका लागि हिरासतबाट बाहिरिने बाटो खुलेको छ।
प्रसाईंलाई असार १२ गते साइबर ब्युरोले पक्राउ गरेको थियो। राष्ट्रिय स्वतन्त्र पार्टीकी सांसद रचना खतिवडाले दिएको उजुरीका आधारमा उनीविरुद्ध विद्युतीय कारोबारसम्बन्धी कसुरमा मुद्दा दर्ता गरिएको थियो।
प्रसाईंमाथि युट्युबमार्फत सांसद खतिवडाको छोराको मृत्यु र सांसद पदसँग सम्बन्धित विषयलाई जोडेर अपमानजनक तथा आपत्तिजनक अभिव्यक्ति दिएको आरोप लागेको थियो। उक्त अभिव्यक्तिले व्यक्तिगत प्रतिष्ठामा आघात पुगेको दाबी गर्दै उजुरी परेको थियो।
अदालतले मुद्दाको सुनुवाइका क्रममा प्रसाईंलाई २ लाख रुपैयाँ धरौटी तोकेर रिहा गर्न आदेश दिएको हो। धरौटीमा रिहा भए पनि मुद्दाको कानुनी प्रक्रिया भने जारी रहनेछ।
