काठमाडौं । नेपाली कांग्रेसको संस्थापन पक्षले १५औँ महाधिवेशनको प्रक्रिया अघि बढाइरहेका बेला इतर समूहका रूपमा रहेको देउवा पक्षले पनि अलग्गै महाधिवेशनको तयारीलाई तीव्र बनाएको छ।
इतर समूहले १५औँ महाधिवेशनअन्तर्गत हालसम्म करिब ८० प्रतिशत वडा अधिवेशन सम्पन्न भइसकेको र दशैँअघि नै सबै क्षेत्रको क्षेत्रीय अधिवेशन सम्पन्न गर्ने जनाएको छ। नेता किरणराज पौडेलका अनुसार अहिले पालिका तहका अधिवेशनहरू भइरहेका छन्।
उनले भने, ‘हालसम्म वडाहरूको ८० प्रतिशत अधिवेशन सकेर पालिकाहरूको भइरहेको छ । दशैँअघिसम्म सबै क्षेत्रको क्षेत्रीय अधिवेशन सम्पन्न हुनेछ।’
इतर समूहले आफ्नो छुट्टै महाधिवेशन आगामी मंसिर २१ देखि २३ गतेसम्म गर्ने कार्यतालिका सार्वजनिक गरेको छ। कार्यतालिकाअनुसार असोज २० गते पालिका अधिवेशन, असोज २३ गते प्रदेश सभा निर्वाचन क्षेत्रीय अधिवेशन र मंसिर ४ गते प्रदेश अधिवेशन गर्ने तयारी गरिएको छ।
समूहका अर्का नेता गुरुराज बरालले ७७ वटै जिल्लामा केन्द्रीय निर्वाचन समितिका तर्फबाट निर्वाचन अधिकृत परिचालन भइसकेको दाबी गरे। उनका अनुसार तोकिएकै मितिमा अधिवेशन सम्पन्न गरी पार्टीलाई थप सुदृढ बनाउने तयारी भइरहेको छ।
तर, कांग्रेसभित्रको विवाद केवल अधिवेशनको कार्यतालिकामा सीमित छैन। पार्टीको आधिकारिकतासम्बन्धी विवाद सर्वोच्च अदालतमा विचाराधीन रहेकै अवस्थामा संस्थापन र इतर दुवै समूहले आ–आफ्नै प्रक्रियाबाट महाधिवेशन अघि बढाइरहेका छन्।
नेता बरालले संस्थापन समूहले गर्न लागेको महाधिवेशनप्रति कडा टिप्पणी गर्दै त्यसलाई ‘क्लब’ को संज्ञा दिए। उनले संस्थापन पक्षले पद थपेर नेतृत्व सुरक्षित गर्न खोजेको आरोपसमेत लगाए।
उनका अनुसार विशेष महाधिवेशनका अगुवाहरू आफू पराजित हुने डरले नयाँ–नयाँ पद सिर्जना गरेर आफ्नो राजनीतिक भविष्य सुरक्षित गर्न खोजिरहेका छन्। यस्तो अभ्यास लोकतान्त्रिक चरित्रअनुकूल हुन नसक्ने उनको दाबी छ।
यसैबीच, इतर समूहले पनि आफ्नो संगठनात्मक संरचना निर्माण र अधिवेशन प्रक्रियालाई तीव्र बनाएको छ। बिहीबार काठमाडौं महानगरको नगर अधिवेशनसमेत हुँदैछ।
सर्वोच्च अदालतमा कांग्रेसको आधिकारिकतासम्बन्धी विवाद कायमै रहेका बेला पार्टीका दुवै धारले छुट्टाछुट्टै महाधिवेशनतर्फ अघि बढेपछि कांग्रेसको आन्तरिक विवाद थप पेचिलो बनेको छ। आगामी दिनमा अधिवेशनको प्रक्रिया र अदालतको निर्णयले कांग्रेसको वैधानिक नेतृत्व र संगठनात्मक संरचनाको दिशा तय गर्ने देखिएको छ।
