काठमाडौं । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि आज हुने भनिएको मतदान निर्धारित समय बितिसक्दा पनि सुरु हुन सकेको छैन। निर्वाचन कार्यतालिकाअनुसार दिउँसो २ः३० बजेबाट मतदान सुरु गर्ने तयारी भए पनि आवश्यक प्रक्रिया पूरा हुन नसक्दा मतदानमा ढिलाइ भएको हो।
मतदानलाई व्यवस्थित र सुरक्षित बनाउन काठमाडौंको खुलामञ्च तथा राष्ट्रिय सभागृह क्षेत्रमा सुरक्षा व्यवस्था कडा पारिएको छ। दुवै मतदान केन्द्रमा बाक्लो संख्यामा सुरक्षाकर्मी परिचालन गरिएको छ।
मतदानस्थल आसपास सुरक्षा निगरानी बढाइए पनि महाधिवेशन प्रतिनिधिलाई समेत हालसम्म खुलामञ्च र राष्ट्रिय सभागृहभित्र प्रवेश गर्न दिइएको छैन। मतदानस्थलमा पत्रकारको प्रवेशमा पनि रोक लगाइएको छ।
नयाँ नेतृत्व चयनका लागि कांग्रेस महाधिवेशन प्रतिनिधिहरू मतदानको प्रतीक्षामा छन्। मतदान सुरु हुने समय अनिश्चित बन्दै जाँदा प्रतिनिधिहरूमा अन्योल बढेको छ। निर्वाचन समितिले आवश्यक तयारी पूरा गरेपछि मात्रै मतदान प्रक्रिया अघि बढाउने तयारी गरेको छ।
