काठमाडौं । नेपाली कांग्रेसका सभापति गगनकुमार थापाले आफ्नो नाम जोडेर विभिन्न उम्मेदवारको सूची प्रचार गरिएकोप्रति आपत्ति जनाउँदै त्यस्ता सूचीलाई आफ्नो आधिकारिक समर्थन वा सिफारिसका रूपमा नबुझ्न आग्रह गरेका छन्।
कांग्रेसको १५औँ महाधिवेशनअन्तर्गत केन्द्रीय कार्यसमिति चयनका लागि मतदान सुरु भएपछि सामाजिक सञ्जालमार्फत धारणा सार्वजनिक गर्दै थापाले यसपटक पार्टीमा कुनै पनि प्यानल वा गुट नरहेको स्पष्ट पारेका हुन्।
उनले आफ्नो नाम जोडेर प्रचार गरिएका उम्मेदवारहरूको सूचीलाई आधिकारिक समर्थनका रूपमा नलिन महाधिवेशन प्रतिनिधिहरूलाई आग्रह गरेका छन्। साथै, यस्ता सूची र अफवाहको पछि नलागी आफ्नो विवेकका आधारमा निर्णय लिन उनले प्रतिनिधिहरूलाई सचेत गराएका छन्।
थापाले महाधिवेशन प्रतिनिधिहरूलाई कुनै भ्रम, दबाब वा प्रभावमा नपरी पार्टीको हितलाई सर्वोपरि राख्दै स्वतन्त्र विवेक, मूल्याङ्कन र विश्वासका आधारमा मतदान गर्न आह्वान गरेका छन्। प्रतिनिधिहरूको विवेकपूर्ण निर्णयले पार्टी संगठनलाई नयाँ उचाइमा पुर्याउने विश्वाससमेत उनले व्यक्त गरेका छन्।
उनले प्राविधिक कारणले महाधिवेशनको निर्वाचन निर्धारित समयभन्दा एक दिन ढिलो सुरु भएको उल्लेख गर्दै त्यसबाट प्रतिनिधिहरूमा परेको असुविधाप्रति क्षमासमेत मागेका छन्। लोकतान्त्रिक अभ्यासलाई मर्यादित र व्यवस्थित बनाउन सबै प्रतिनिधिलाई संयमित तथा उत्साहपूर्ण ढङ्गले मतदान प्रक्रियामा सहभागी हुन उनको आग्रह छ।
बिहीबार राति केन्द्रीय कार्यसमितिका विभिन्न पदमा उम्मेदवारी दिएका नेताहरूको नाम समेटिएको एउटा सूची सार्वजनिक भएको थियो। उक्त सूचीमा आफ्नो आधिकारिक सिफारिस वा समर्थन नरहेको स्पष्ट पार्दै थापाले प्रतिनिधिहरूलाई भ्रममा नपर्न सन्देश दिएका हुन्।
कांग्रेसको नयाँ नेतृत्व चयनका लागि भइरहेको मतदानका बीच थापाको यो भनाइले उम्मेदवारहरूको नाममा आफ्नो समर्थन रहेको भन्दै प्रचार गरिएका सूचीबारे स्पष्ट सन्देश दिएको छ।
